Shillong, Rymphang 09 : U National General Secretary bad Symbud Myntri Rangbah ka Jylla Bah Sniawbhalang Dhar, ha ka sngi Palei ula kyntu ia ki Nongialam ka ri-lum Jaintia ba kin iatreilang lang kum ka kynhun ha kaban pynthikna ia ka jingjop jong ka NPP bad ka kyrtong Kong Ampareen Lyngdoh ha ka elekshon Lok Sabha na Shillong Parliamentary seat.
Haba kren ha ka jingialang kaba long ha Iingdorbar Shnong ka Wahiajer, kaba hap hapoh ka Nartiang Constituency, u Bah Sniawbhalang ula ong “Ngi hap ban trei shitom bad iatreilang kum ka kynhun ban pynthikna ia ka jingjop jong ka party na Shillong constituency”.
U pyntip ba shen, ka NPP kan sa pynlong ia ka jingialang bad ki kynhun bapher bapher ban pan ia ka jingkyrshan jong ki ha kane ka elekshon Lok Sabha ban wan.
Haba ai jingkren, ka Kong Ampareen kaba dei ruh ka Myntri Sorkar bad MLA ka East Shillong, kala kyntu ia ki paidbah ka Nartong bad Jowai constituency ba kin vote ia ka ha ka elekshon Lok Sabha ban wan.
Ka Kong Ampareen kala ong ba ki paidbah kila jied ia u MP ba mynta, u bym ju da kren halor ki skhim bapher bapher jong ka Sorkar Pdeng kiba iadei bad ka koit ka khiah, ka scholarship bad kiwei kiwei.
Kala ong ha ka jingshisha, ka jingslem jong ka Jylla ban ioh ia ka Inner Line Permit (ILP) ka dei ia kaba kren hapoh ka Iingdorbar Parliament.
Kala ai ka jingkular ba shen yn sa plie noh ia ka AYUSH hospital ha Mookyndur, West Jaintia Hills. Ia kane ka project la mang T. 10 klur.
Kane ka kyrtong MP kala ai jingkren ruh ha ka jingialang ha Jowai, kaba la wan iashimbynta da ki nongkitkam ka NPP bad ki Nongkyrshan.
