Shillong, Rymphang 09 : Ka seng Hynniewtrep National Liberation Council (HNLC) kala phah ktien sha u Symbud Myntri Rangbah ka Jylla Bah Prestone Tynsong ba pyntip ia ka jingpdiang jong ki Nongialam ban iakynduh.
Ia kane la pyntip da u General Secretary-cum- Publicity Secretary ka HNLC Bah Sainkupar Nongtraw lyngba ka Facebook uba la ong pat ba kane ka jingiakynduh kan long ha kano kano ka ri kaba ka seng kan pynbeit.
Kane ka rai jong ka HNLC kala mih hadien ka jingtyrwa jong u Symbud Myntri Rangbah ban iakynduh ia ki nongialam ka Seng ha kano kano ka jaka ba ka seng ka sngewbit bad sngew shngain.
Kane ka jingtyrwa kala mih hadien ba ka HNLC kala pynbna ban weng noh ialade na ka jingiakren iasuk bad ka Sorkar Pdeng bad Sorkar Jylla ha ka 3 tarik Kyllalyngkot 2024.
U Bah Sainkupar ula thoh ha Facebook “Nga lah phah ktien sha u Bah Prestone ba ngi pdiang sngewbha iaka jingtyrwa jong u ban iakynduh iangi ki Nongialam ka HNLC ha kano kano ka jaka…ka jaka ngin pynbeit mangi da ka dei ha kano kano ka ri …ngin ai ia u iaka safe passage…ngin pynbiang ka bam ka dih..ka jaka thiah ka jaka dem bad ngin sumar ia u ….kumta ym dei ban artatien ne sheptieng…”.
Lah ban kdew hangne, ka HNLC kala weng noh ialade na ka jingiakren iasuk bad ka Sorkar ha ka 3 tarik Kyllalyngkot da kaba ong ba ka Sorkar kam shym la mynjur ban pyntreikam ia ki 5 tylli ki mat jingdawa ba hakhmat jong ka seng kiba kynthup ia ka jingweng noh ia baroh ki case pyrshah ia ki Nongialam bad ki dkhot jong ka seng.
