Shillong, Rymphang 09: U Deputy CEM ka KHADC u Bah PN Syiem hynne ka sngi Thohdieng ula pyllait paidbah ia ka Theme song jong ka Monolith Festival bad ia ka media Campaign Vehicle ne ka kali kaban leit pynbna shaphang kane ka Festival, ha ka jingialang kaba la long ha District Council.
Haba kren ha ka jingialang ula ong ba ka Festival kadei ban pyninam iaka jinglong tynrai u Khasi ha ka rwai ka saw, ka tem ka put, ka bam bad ka riam tynrai.
Ula ong ba ka Council kan sa shong pyrkhat ban pynlong man la ka por ia ka Monolith Festival ha Khasi Heritage Village, Mawphlang bad yn pynkhreh ruh ia ka Bill ba kan dei ka kamram ia ka Executive Committee jong ka Council ba kin pynlong beit ia kane ka Festival man la u snem.
Ha kane ka jingpyllait ia Theme Song bad ia ka Kali ai jingpynbna, la iadonlang ki Executive Member kiba kynthup ia u Bah Gigur Myrthong, Bah Victor Ranee, Bah Teibor Pathaw, Kong Grace Mary Kharpuri, Kong Macdalyn Sawkmie Malong, Bah Rangkynsai Kharbuki, Bah Fanton Lakadong bad kiwei kiwei ha kaba la iadonlang ruh ki ophisar jong ka Council.
Ka Monolith Festival kan sdang ha ka 22, 23 bad 24 tarik u Rymphang mynta u snem bad ia kane ka tamasa yn pynlong da ka KHADC ryngkat ka jingiatreilang bad ka tnad Tourism jong ka sorkar jylla.
La pynlong ia ka Monolith Festival nyngkong eh ha u snem 2013 bad ha ka sien ka baar ha u snem 2016 bad kane kaba mynta ka kyntinkan dei ha ka sien kaba lai.
