Shillong Lber 26: U Kyrtong ka seng United Democratic Party (UDP) u Bah Robertjune Kharjahrin, ula ong ba 100 na ka 100 yn jop ia ka elekshon namar ka jingiakhun ia ka elekshon ka dei halor ki mat ki jura ha kaban iada ia ka ri bad ia ka jaidbynriew bad ia ka jylla.
“Nga skhem jingmut ba 100 % ngin jop ia kane ka elekshon namar ngi iakhun halor ki mat ki jur ban iada ia ka Ri bad ka Jaidbynriew bad ia ka Jylla ha kaban pynneh pynsah ia ka riti ka dustur, ki snap kiba kyrpang bad ia ka khyndew ka shyiap bad kumjuh ruh ban kyntiew ia ka ri bad ka jaidbynriew. Ngi don ka jingkyrmen ba ki paidbah nongshong shnong kin pdiang ia kata” ong u Bah Kharjahrin haba iakren bad ki nongthoh khubor hadien ka jingthep kyrteng.
Kat kum ka jingong jong u, ka RDA kan leit sha kane ka elekshon halor ka hok bad ka jingshisha. “Nga don ia ka jingngeit kaba skhem ba ngin jop ia kane ka elekshon namar ki paidbah nongshong shnong jong ka Shillong Parliamentary Constituency ki long kiba stad kiba shemphang bad kin bishar ia ngi ki kyrtong da ki mat ki jura bad da ka hok bad jingshisha”.
U Bah Kharjahrin ula iathuh ba ka mat ba hakhmat eh ka dei ka Inner Line Permit bad kiwei ki kynthup ia ka jingpynbeit thymmai ia ka MMDR Act, ban pynbeit ia u pud u sam bad ka Jylla Assam nalor u pud u sam ka India-Bangladesh, ban pynrung noh ia ka ktien Khasi ha ka khyrnit kaba phra, ka jingpynioh iala ka jong ka ‘Cadre’ ha ki Civil Service ka Jylla bad kiwei kiwei.
Une u Kyrtong ka RDA ula ong “Ngi kwah ban pynkhlaiñ ia ka riti synshar paidbah bad ngi donkam ia ka Pre Legislation Consultative Policy, ngi donkam ban pynthikna ba ki ïingkashari kin treikam laitluid khlem kano kano ka jingmushlia jong ki bor sorkar namar khlem ka iingkashari kaba laitluid ne Independent Judiciary ka long kaba eh haduh katta katta ba ngin ioh ia ka hok ka jong ngi ha ka jylla”.
Halor ka jingkam ba dei tang ka VPP kaba ieid ri ieid Jaidbynriew, u Bah Robertjune ula ong “La 20 tylli ki snem nga la shakri ia ka ri bad ka jaidbynriew lyngba ka sengbhalang, nga la don ryngkat ha ka por ba ka jaidbynriew ka donkam ia nga, nga la ieng ban iakhun ban pynioh ILP, nga la don ryngkat bad ki paidbah kiba sah ha khappud, nga la mih ruh ha ka jingiakhun pyrshah ia ka CAB. Phi lah ban buh jingkylli ia shibun kiei kiei, hynrei tang kane kawei nga kyrpad ia u Bah Ardent bad ia kiwei, sngewbha wat nym buh jingkylli ia ka jingieid ri ka jong nga”.
