Shillong, Jylliew 22: Ka Early Childhood Development (ECD) Mission ka Jylla Meghalaya, kala ioh pdiang ia ka khusnam Gold SKOCH Award ha ka jingialang kaba 108 jongka SKOCH Summit Public Policy Forum on Regulatory Framework for Viksit Bharat, kaba la pynlong ha PHD Chamber of Commerce and Industry, ha Ningbah Delhi.
Ka ECD Mission ka Meghalaya, kala ioh pdiang ia katei ka khusnam ha ka kyrdan jong ka Early Childhood Development hadien ka jingshah bishar bniah da ki riewstad bad ki riewshemphang jong ka ri.
Kane ka jingioh khusnam kadei ka jingai jingithuh ia ka jinglamkhmat jong ka jylla Meghalaya ha kaban tei ia ka rukom treikam kaba janai na ka bynta ka ECD, da kaba buh ia ka jylla ha ka ri kum ka nongialam ha ka jingleh ia kei kaei kaba long thymmai ha ka jingshakri ia ki paitbah bad ia ka imlang sahlang baroh kawei.
Ka ECD Mission jong ka jylla kala shah jied hapdeng jong kiba bun tylli ki sienjam kiba la shim ha ka ri baroh kawei bad kala don ruh hapdeng jong ka jingshah bishar bniah kaba kynthup ia ka jingai jingbatai kaba janai, ka jingthep vote ki paitbah, ka jingbishar bniah jong ki riewstad bad ki riewshemphang, ki dur, ki durkhih, ka jingwanrah ia ka jingkylla bad ka jingshah bishar bniah halor ka jingioh jingmyntoi jong ki paitbah na katei ka Misson.
Ha kane ka jingshah bishar bniah, kane ka Mission kala pyni ia ka jinglong kyrpang bad ia ka rukom treikam ha kaba iadei bad ka ECD lyngba ka jingiatreilang kaba la lamkhmat da ka Tnad Social Welfare kum ka tnad kaba khmih ia kane ka kam, kane ka Mission kala seisoh ruh ha kaban wanrah lang ia ka tand ka koit ka khiah, Community & Rural Development Department (MSRLS & SRES), ka tnad pule puthi, ki paralok ne kynhun kiba iatreilang, ki Balang bapher bapher, ki jaka pule jong ki kynhun bapher ha ka imlang sahlang, ki nongtrei kiba hakhmat eh ha ka koit ka khiah ban kyntiew ia ka jinglong jingman jong ki khunlung ha ka khyllipmat kaba kongsan tam ha ka jingim ka jongki.
Ka jingioh pdiang ka jylla ia ka Gold SKOCH Award kam dei tang ka jingioh jingithuh ia ka kam kaba la leh ha ki snem kiba la dep, hynrei kan pynskhem ruh ia ka jingkular ka jylla ban pynthikna ba man la ki khunlung kin ioh ia ka jingsumar sukher, ka bam ba tei, ka jingiada bad ki lad ba kin heh kin san bha.
Ha ka bynta kaba khatduh jong ka jingshah bishar bniah ban ioh pdiang ia ka khusnam SKOCH Award, ia ki jingpyni bad ia ki jingai ia ki jingbatai kiba bniah, ia ka kynhun jongka Meghalaya Early Childhood Development Mission la ialam da u Bah Ronald Kynta u Chief Operating Officer jong ka Meghalaya ECD Mission, ka Programme Manager ka Kong Nayna Warjri bad u u Civil Engineer u Bah Meaibor Hiam Roy M. Pdah.
 Mission ka Jylla Meghalaya, kala ioh pdiang ia ka khusnam Gold SKOCH Award ha ka jingialang kaba 108 jongka SKOCH Summit Public Policy Forum on Regulatory Framework for Viksit Bharat, kaba la pynlong ha PHD Chamber of Commerce and Industry, ha Ningbah Delhi.){kind=link}