Nongpoh, Lber 24 : Ka United Democratic Party (UDP) kala kob ba ka jingpra phom jong ka party ha Ri-Bhoi District, kan ym don jingktah satia ia u kyrtong ka party ba mihkhmat na ka kynhun synrop Regional Democratic Alliance (RDA) ha kane ka elekshon Lok Sabha, ka ban long la 19 tarik Iaiong.
Kane ka sur jong ka UDP kala mih na ka jingialang ialap elekshon jong ka party kaba long hynnin ka sngi saitjain ha Mawhati.
Lah ban kdew hangne, ka sem jong ka UDP Ri-Bhoi kala pra phom ha Ri-Bhoi da ka jingmih noh haduh 31 ngut ki Nongialam bad Nongkitkam jong ka UDP Ri-Bhoi District, Women’s Wing bad Youth Wing hapoh ka jingialam u President ka UDP-Ri-Bhoi District Bah Donbok Khymdeit, uba bat ruh kum u Working President ka UDP Sengkmie.
U Bah Donbok Khymdeit u dei ruh u MLA/MDC barim ka Mawhati Constituency.
Ha kane ka jingialang ha Mawhati, ki Nongialam ka UDP kila ong ba ka jingmih noh u Bah Donbok bad katto katne ngut ki Nongitkam kan ym ktah satia da lei lei ruh ia ka party khamtam ha ka jingpynkhreh ia ka elekshon Lok Sabha.
Haba iakren bad ki nongthoh khubor, u General Secretary ka UDP-Sengkmie Bah Jemino Mawthoh ula pynpaw ba kum ka seng riewlum kaba la rim, ka don hi ka jingsngew diaw ba u Bah Donbok Khyndeit ula mih noh na ka party haba ong pat “Kane ka shong ha ka mon jong u bad ki katto katne ngut”.
“Ka jingmih jong ki, kan ym ktah da lei lei ruh namar kat kum ka jigntip ba la iohlum, ka jingmih ka dei tang kumba katto katne percent. Ka UDP ka dei ka party kaba la rim bad kaba la shong karbon bha ha ka Jaidbynriew bad ka dang khlain haduh mynta” ula ong.
“Ngi iohi shai ba ka UDP ka dang rhem bha ka rukom treikam ha ka kam sainhima sima khamtam na ka jingdon jong ki MLA bad MDC kiba trei shitom ban nang pynkhlain ia ka party” ula bynrap.
U Bah Jemino ula ong “Ha ka jingiaid ialap elekshon jong ngi ban iakhun ia ka eleksion MP lyngba ka kynhun RDA, ngi iohi ia ka jingkyrmen kaba skhem ban ioh ia ka jingjop”.
“Ka jingialang ha Umroi Konstituensi dang shen ka dei ka sakhi na ka jingwan tuid ki nongialam bad nongkyrshan kiba bun kaba paw shai ruh ba ki paidbah ki dang ieid ia kane ka party. Ka jingmih u Bah Donbok Khymdeit kam dei satia ka ban pynduhbor ia ka party hynrei kan nang wanrah ia ka jingiatylli hapdeng ki nongkitkam bad nongkyrshan” ula ong.
