Jynrat ia signboard pung dohkha|khang ia ka project ka Tnad Water Resource
Nongpoh, Lber 24 : U MLA ka NPP na Jirang Constituency Bah Sosthenes Sohtun, ula ujor sha u Myntri Rangbah ka Jylla Conrad K Sangma, halor ka jingwan leh donbor jong ka Sorkar Assam hapoh ka shnong Maikhuli bad ha shnong Hawla, kiba don hapoh khappud ka Meghalaya-Assam.
La kynnoh ba ka Sorkar Assam hynnin ka sngi Saitjain, kala phah ia ki Pulit ban leit khang ia ka project bala pyntrei da ka Tnad Water Resource ha ka shnong Hawla bad kumjuh ruh hynne ka sngi U Blei, ban jynrat ia ka signboard jong ka pung dohkha kaba don ha Maikhuli. Kine ki shnong ki dei kiba dang hap hapoh ka Jirang Constituency.
Halor kane ka jingjia, u MLA ka Jirang ulaleit ban jurip ia kine ki jaka bad hadien ka jingshem dalade ia kaei kaba jia, ula ujor sha u Myntri Rangbah ka Jylla bad ula pyntip ruh sha u Deputy Commissioner bad u Superintendent of Police ba kin leit jurip bad leh ia kaba donkam.
Lah ban kdew hangne, ka project ha ka shnong Hawla ka dei kaba pyntrei da ka Tnad Water Resource na Nongpoh bad ka signboard jong ka pung dohkha ha Maikhuli, ka dei kaba project bala pyntrei na ka skhim MGNREGS.
Haba kren sha ki nongthoh khubor, u Bah Sosthenes ula ong ba kum u Nongmihkhmat ka thain, u pynrem jur ia kine ki kam leh donbor jong ka Assam wat hapdeng jong ka jingiakren pynbeit pud, kaba dang iaid shakhmat mynta.
“Nga la pyntip ia kine ki kam leh donbor sha u Myntri Rangbah ka Jylla ba un shimkhia bad iakren lem bad ka Sorkar Assam. Nga la pyntip ruh sha u DC bad SP ba kin phah ia ki Magistrate bad ki Pulit ba kin leit jurip” ula ong.
Une u MLA u pyntip ba ki bor Sorkar kila shimkhia ia kane ka kam haba iathuh ba u DC ka Kamrup ula kular ban phah shna biang ia ka signboard ha Maikhuli.
Ha kajuh ka por, u MLA ula ai ka jingiaroh ia ki nongshongshnong ka Maikhuli kiba la mih ban pyrshah ia kane ka jingwan leh donbor ki Pulit Assam. Ula ong ba ka jingshlur jong ki longkpa, longkmie bad ki samla ka long ruh kaba donkam ban iada iala ka jong ka khyndew ka shyiap.
