Shillong, Jymmang 21 : U MLA ka BJP na South Shillong Bah Sanbor Shullai ha ka sngi Ba-ar, ula kam ba haduh 30% ki nongkyrshan jong ka BJP ki khlem leit thep vote ha ka elekshon Lok Sabha namar ka jingbitar ia ka Party baka khlem pynieng iala u kyrtong na Shillong Parliamentary seat.
Haba iakren bad ki nongthoh khubor, u Bah Sanbor ula ong “Ha South Shillong….30% na ki nongkyrshan ba radbah ka BJP ki khlem leit thep vote namar ka jingbitar. Kine ki kynthup ia ki Rangbah, ki Longkmie bad ki samla shynrang bad kynthei”.
“Ki Volunteer jong ngi ki ong Bah ki briew kila leit ban khnion ia u budam ak EVM hynrei namar ba ka kyrteng jong nga kam don satia bad ba ka shap jong nga kam don satia, kila leit sha ki Presiding Officer bad kylli shaei ka kyrteng u Bah Sanbor bad shaei ka shap Lotus jong u Narendra Modi bad kumta hi kila mih noh bad khlem thep vote” ula bynrap.
Ka BJP ka khlem thep pynieng kyrtong satia ha baroh artylli ki constituency-Shillong bad Tura, hadien b aka rai ban ai ka jingkyrshan ba pura ia ka National People’s Party (NPP) ha ka elekshon Lok Sabha myn ha ka 19 tarik Iaiong bad ka jingniew vote ka ban long la 4 tarik Jylliew.
Ka South Shillong ka dei ka constituency kaba poi duna eh na ki nongthep vote, kaba kot tang 58.36 %.
Hynrei u Bah Sanbor ula pynpaw ia ka jingsngewskhem ba ka BJP kan nang jop hi na South Shillong Constituency.
“Watla ka kyrteng jong nga kam don satia bad ka shap jong nga ruh kam don satia hynrei ngin dang jop hi na ka constituency jong nga. U bah Sanbor bad ka BJP kin jop na South Shillong” ula ong.
Haba kylli, une u Myntri barim ka Sorkar ula ong b aula lah ban jop ia ka ‘takma rynnong’ da kaba wan balai ha ka elekshon Lok Sabha 2019.
“Ha ka por ba ki pynieng ia nga, nga la wan ba lai. Nga khlem ioh ia ka takma ksiar, nga khlem ioh ia ka takma rupa hynrei nga dang ioh pat ia ka lad ban ioh ha ka rynsan ki nongjop, nga ioh ia ka takma rynnong ba nga wan balai. Kumta nga sngew ba ha kane ka kynti kila dei ban pynieng kyrteng namar kumba phi iohi, nga la phah ia ka shithi ba kyrshan ia ka Dr Fenela Lyngdoh kum ka kyrtong BJP hynrei haba kut haba ka partu kala pynmih ia kane ka jingbthah, ngi la hap ban kohnguh ia ka” ula ong.
U Bah Sanbor ula ong ba ka BJP ha South Shillong kala kyrshan pura met bad mynsiem ia ka NPP ha ka elekshon MP.
