Shillong, K’lyngkot 31 : U Kyrtong ka National People’s Party (NPP) na Mylliem Bah Finestar Kharkongor, ula pyndep ia ka jingthep kyrteng ban iakhun ia ka elekshon KHADC, ka ban long ha ka 21 tarik u Rymphang.
U Bah Finestar ula leit thep kyrteng hakhmat u Returning Officer ha Inter State Bus Terminus (ISBT) ha Mawlai Mawiong bad la synran ia u da ki Nongialam ka NPP, ki bahaiing hasem bad ki paralok parajor nalor ki nongkyrshan.
U MLA bad Myntri barim ka Sorkar uba bat mynta kum u State Working President ka NPP Bah Hamletson Dohling, ula iadonlang ban synran ia u Bah Finestar ha kane ka sngi.
Haba iakren bad ki nongthoh khubor, u Bah Finestar ula pynpaw ia ka jingsngewskhem ba un ioh ia ka jingjop ha kane ka elekshon haba pynpaw ia ka jingangnud ban shakri ia ki paidbah ka Mylliem bad ban wanrah ia ki jingkylla ki ban ai shibun ki jingmyntoi ia ki nongshongshnong ka constituency.
