Elekshon KHADC | Thep kyrteng 3 ngut ki kyrtong ka BJP ban mih aireng

Shillong, Rymphang 01 : Lai ngut ki kyrtong ka Bharatiya Janata Party (BJP) ha ka sngi Saitjain, kila leit ban thep kyrteng kum ki kyrtong ban iakhun ia ka elekshon KHADC ka ban long la 21 tarik Rymphang haba kyntu ruh ia ki paidbah ba kin jied ia ka party ka ban pynthikna ia ka roi ka par ha baroh ki liang hapoh ka thain.

Kine ki kynthup ia ka kong Daniella Nonglait na Mawlai constituency, Bah Kynsaibor Lyngdoh na Laitumkhrah-Malki bad u Bah Fairlock D Ryngkai na Nongthymmai constituency.

Haba iakren bad ki nongthoh khubor hadien ba dep thep kyrteng, ka kong Daniella kala ong “Nga deo tang ma nga ka kyrtong kynthei ka ban iakhun pyrshah ia 5 ngut ki kyrtong shynrang. Ki don khyndiat eh ki nongmihkhmat kynthei ha District Council. Lada ki paidbah ki jied ia nga, ka jingdon ki nongmihkhmat kynthei kan sa nang bun”.

Haba kyntu ia ki paidbah ba kin jied ia ka BJP, kala ong ‘Lada ngi wan ha ka bor, ngin pynthikna ba ki Rangbah Shnong kin ioh ia ka jingsiew honorarium ba manla u bnai bad ki Kynthei ba ri khun dalade bad ki nongniah kali kin ioh ia ka song jing iarap pisa ba T.2000 shibnai. Kumta, nga kyrpad ia ki paidbah ka Mawlai ba kin jied ia ngi”.

U Bah Kynshai bor ha kawei ka liang ula pynpaw ba u kwah ban iada ia ka hok bad ka bha ka miat jong ki trai ri trai muluk lyngba ka KHADC.

“Lada nga shah jied, nga kwah ruh ban pynthikna ia ka synshar khadar kaba khuid. Ka kaiphod CAG dang shen kala pynpaw ia bun ki kam bym hok bad jingpyndonkam bakla ia ka pisa hapoh ka Council. Nga kwah banpynthikna ia ka thung kam thungjam kaba shai ha KHADC. Kumta, nga kyrpad rit ia ki paidbah ban kyrshan ia nga kum u kyrtong” ula bynrap.

Haba pynsngew ia kajuh ka sur, u Bah Ryngksai ula ong ba ka BJP lad aka wan ha ka bor, kan pynthikna ia ka Direct Funding sha ki ADC bad ban wanrah ia ka roi ka par ha baroh ki liang lyngba ki Dorbar Shnong.