Shillong, Rymphang 01 : U MDC ba mynta ka Nongkrem Bah Lambor Malngiang ha ka sngi Saitjain, ula pynpaw ia ka jing sngewskhem ba un jop biang kum u MDC ha kane ka elekshon ka KHADC ka ban long la 21 tarik Rymphang.
Haba iakren bad ki nongthoh khubor hadien ba dep thep kyrteng, u Bah Lambor ula ong “Ka rai ba ngan iakhun kum u kyrtong shimet ka dei kaba la pynshong nongrim na ki jingai jingmut jong ki paidbah ka Constituency. Ngam don jingar tatien ba ka jingieid ba nga ioh na ki paidbah kan pynthikna ba ngan jop ia ka elekshon”.
Ula ban jur ruh ia ka jingdonkam ban nang pynkhlain ia ka Sixth Sxhedule jong ka Riti Synshar ka Ri India bad ong “Namar kala ai ka jingiada ia ki riewlum trai ri trai muluk bad ia ka Bri jong ngi”.
“Ngi la wanrah bad mynjur ia bun tylli ki Bill ba kongsan bad ngin iai bteng ban wanrah ia ki ain kiba treikam bha ha ka ban iada ia ki briew jong ngi bad ia ka Ri jong ngi” kular u bah Lambor.
Une u MDC ula pynkynmaw ruh ia ki jingnoh synniang jong u ha ka por ba wan lynshop ka khnam Covid bad ong “Ngi ngeit ba ki kam jong ngi kin long ki pyrnon ki ban ialam ia ngi sha ki jingjop ba bun ha ki snem ban wan”.
Halor ka ujor ba mudui da u MLA ka VPP Ardent M Basaiawmoit pyrshah ia u, u Bah Lambor ula ong “Kane ka dang sah ha ka jingbishar ka Iingkashari. Ngam lah ban kynthoh eiei ia ka hynrei haba iatai ha ki rynsan elekshon ngi hap ban don iala ki jong ki nia ki jutang bad tang namar kata, kala don ka mukotduma bala ujor pyrshah ia nga da u MLA. Ula dawa ruh ba nga dei ban siew da ki klur tyngka hynrei kam pher ngin iai bteng ban trei iala ka jong ka kam”.
