Shillong Rymphang 11: U CEM ka KHADC Bah Pyniaid Sing Syiem hynne ka sngi Ba-ar ula pynthikna ban buh ia ki Coaching Centre, Rehabilitation Centre, ban kyntiew ia ka jingseng kam lajong, ki kam ialehkai bad ban kyntiew ia ka koit ka khiah, lada u shah jied kum u MDC jongka Nongthymmai constituency.
Ula pynpaw ia ka jingskhem jingmut bay n jop ia ka elekshon MDC jong ka KHADC kaban long ha ka 21 tarik u Rymphang, u Bah Pyniaid Syiem ula ong, “Lada nga shah jied kum u MDC, nga buh ia ka Coaching Centre ha Nongthymmai constituency, kaban long kaba ia ryngkat bad ki Centre ha Delhi. Kane ka centre kan ai jinghikai ei ia ki samla jong ka constituency ba kin pynkhreh ialade na ka bynta ki eksamin ki bapher bapher. Ngin leh ia kane namar ba ngi lah iohi ba bun ki briew khamtam kito kiba wan na ki longiing baduk kim lah kot bor ban leh shabar ban ioh ia ka jinghikai pyntbit”.
“Ngin pynshlur ruh ban sengkam lajong hapdeng jong ki samla khnang ba kan ym long tang ka jingiohkam ka jongki hynrei kin long ruh kum kita kiba aikam kylla ia kiwei ruh.Nalor katei ngi kwah ban kyntiew ia ki kam ialehkai na ka bynta ki samla. Ia kane ka rai la shim hadien ka jingiasyllok bad ki khynnah samla khamtam bad kito kiban dang thep vote ha ka sien kaba nyngkong eh” la ong u Bah Pyniaid bad ka bynrap “Ngam don jingartatien bad a kaba pynshong nongrim ia ki mat treikam ki jong ngi, ki paidbah kin jied ia ngi ha ka elekshon ban wan”.
Nalor kane u Bah Pyniaid ula kular ruh ban shimkhia bad ka sorkar jylla ia ka jingdonkam ban kyntiew shuh shuh ia ki jaka ai jingsumar ia ki paidbah bad halor ka jingkyrduh um hapoh jong ka constituency.
“Nalor ka jingwanrah ruh ia ki ain ki bapher halor ki mat bapher bapher, ngi don ruh ia ka jingkitkhlieh ban wanrah ia ka roi ka par hapoh ka constituency. Lada nga ioh ia ka lad, ngan shimkhia halor kiba bun ki mat kiba mad da ka constituency bad ka sorkar jylla” ula ong bad ka bynrap “Ki don ki shnong hapoh ka constituency, kaba ki nongshong shnong ki hap ban shu thied ia ka umbam umdih bad ki don ruh ki briew ki bym kot bor ban leit phah sumar haba ki pang ki shitom, kumta ngi donkam ban kyntiew ia ki jaka ai jingsumar”.
“Ngi kwah ruh ban buh ia ka Counselling bad ki Rehabilitation Centre na ka bynta kiti ki bym kot bor ban ioh ia ka jingsumar na ka jingkyrni ha ka jingdih drok.Ngi kwah ban pynthikna ba kidei ban leit sah ha ki Rehabilitation Centre. Nalor kane ngi kwah ruh ban buh ia ka Skill Development Institute ban ai jinghikai ia ki samla ha ki kam khaii pateng bapher bapher khnang ba kan long ka lad iohkam iohjam” ula bynrap.
