Elekshon KHADC | Shah pynhap u Bah Ardent na shuki CEM namar ka kam ai “Jait Kpa’

U Bah Ardent u dei u riew ieid Jaidbynriew ba Khawpud tam :Grace

Shillong, Rymphang 14 : Ka MDC ba lai samoi ka Nongskhen bad kyrtong ka NPP kong Grace Mary Kharpuri, kala iathuh ba u President ka VPP bad MLA ka Nongkrem Bah Ardent M Basaiawmoit ula shah dawa ban hiar shuki kum u Chief Executive Member (CEM) ka KHADC ha u snem 2014 namar ba u thmu ban pynkylla ia ka dustur ban “ai Jait Kpa”.

“Ha ka jingialang ka Executive Committee (EC) u snem 2014, ka mat ban aijait noh sha u Kpa la wan rah ban iakren bad ngi baroh ki MDC ngi la kyntait ban pdiang namar ka kwah ban pynduh noh ia ka dustur uba rim ba jah ban ai jait sha ka Kmie” ong ka kong Grace kaba dei ruh ka Executive Member (EM) haba ialap elekshon ha Nongskhem ha ka sngi Palei.

Ka ong ba kane ka mat ka dei ka bym lah ban pdiang da ki dkhot ka EC ha katei ka por bad kane ka la lam sha ka jingdawa ba u Bah Ardent un hiar shuki noh mardor haba bynrap ba kin (VPP) sa pyr shang biang ban wanrah ia kane ka mat ban shim ia ka Jait Kpa lada ki shah jied ban wan ha ka bor ha KHADC.

“Namar kata, kumno phin shaniah ia ki (VPP) ban shim ia kat kane ka kam ban synshar hapoh ka District Council haba ka jingthmu jong ki ka long ban pynduh jait noh ia ka riti dustur ba riewspah jong ngi ka Jaidbynrew” ong ka kong Grace.

Kala kynthoh tyngeh ruh ia ka VPP halor ka jingbyrngem ia ki Dorbar Shnong bad ong “Lashai lada ki wan ha ka bor, nga thikna ba khlem artatien kin thombor lut ia baroh”.

Kane ka MDC kynthei kala niew ruh ba u Bah Ardent uba kam ba ieid Jaidbynriew kum u ‘khawpud” namar dei ma u, uba nyngkong eh napdeng ki 8 ngut ki MDC, uban iehnoh kam kum u MDC ba shep tieng ia ka jingshah mait kyrteng kumu MLA hadien ba mynjur ia ka ain bat arkam (dual post) da ka Sorkar Congress ba ialam u Mukul Sangma.

“Phi la iohi mynta ia ka rukom kren jong ki la kumba dei tang ma ki kiba tip lut ia kiei kiei baroh hynrei nga kwah ban kylli ba kaei kaba pynlong ia phi ban ngat ha ka jingriam jong ka Ain bala wanrah da u Mukul Sangma” kala buh jingkylli.

“Ka dei tang u Bah PN Syiem, u MDC ba mynta ka Mawkhar-Pynthorumkhrah, uba ieng skhem ha ka nongrim bad iatynjuh ia kane ka ain hynrei kito kiba hylla ieid Jaidbynriew pat ki dei ma ki, kiba nyng kong eh ban iehnoh kam kum ki MDC. Kane kam dei mo kaba pyni ia ka jinglong khawpud? Ong ka kongGrace haba kyntu ia ki paidbah ba kim dei ban shaniah ia kum kine ki briew, kiba kwah tang ban don ha ka bor hynrei ki kynran dien na ki jingkitkhlieh ha ki khep kiba jynjar.

Haba kyntu ia ki paidbah ba kim dei ban biej ha ki jingkynnoh bapher bapher jong ki Liang Pyrshah, ka kong Grace kala ong “Peitia ki kam pynroiba ai da ka NPP hapoh ka constituency. Kumta, nga kyrpad ia phi ban ai ka jingkyrshan ba pura ia nga bad nga kular ba ngan bteng ban iadon ryngkat beit bad phi lada phi nang ailad ia nga ban long biang ka MDC jong phi”.

Kala iaroh ruh ia ka Sorkar NPP halor ka jingnud ban shim ia ka rai ban pynbeit noh ia ki kam iakajia pud bad ka Assam. Hynriew tylli ki jaka napdeng ki 12 tylli kiba don hapdeng ka jingiakajia, la dep ban pynbeit haduh mynta.