Shillong, Rymphang 18 : U National President ka National People’s Party (NPP) bad Myntri Rangbah Conrad K Sangma, ula kyntu ia ki paidbah ka Ri-lum Khasi Jaintia ba kin kyntait war ia ki seng sain pyrthei kiba pyrshang ban wanrah ia ka jingsngew iapher jaidbynriew ha ka elekshon KHADC bad JHADC, ka ban long la 21 tarik Rymphang.
“Ka elekshon ban wan kan dei ka kabu ban ai ia ka jubab kaba bang eh ia kito ki seng sain pyrthei kiba pyrshang ban phiah bad wanrah ia ka jingiapait iapra ki briew jong ngi” ong u Conrad haba kren ha ka rynsan ialap elekshon ha Dangar hynne ka sngi Ba-ar, kaba hap hapoh ka Mawsynran constituency.
“Ngi dei ban kyntait bad kynjat ia ki seng sain pyrthei kiba pyrshang ban phiah ia ki briew jong ngi” ula ong haba bynrap “Ngi hap ban ieng pyrshah jur ia ka sain pyrthei ba pyniapait iapra bad nym ailad ia ki seng sain pyrthei kiba pyrshang ban wanrah ia ka jingiashun bad iapait iapra hapdeng ki briew jong ngi”.
U Conrad ula ong ba ka jingthep vote ka dei ka hok bala pynkup bor da ka riti synshar ka Ri ia ki briew jong ngi bad ban jur ba kam don satia kano kano ka jingthmu ban nym shah ia ki trai ri trai muluk ba kin leit thep vote lane pynduh ia ki jaidbynriew riewlum ba rit paid ha ka elekshon KHADC bad JHADC.
U Conrad ula leit ialap elekshon ruh ha Cherrakata, Pataghat bad ha Mawsynram ban pan jingkyrshan ia u kyrtong ka NPP Bah Alvin Sawkmie.
Haba pynkynmaw ia ki jingkular bala pynurlong hadien ka elekshon KHADC 2019, khamtam ha ki thain khappud ka India-Bangladesh, ula ong “Ngi la ithuh ia ki jingeh bala iakynduh da ki briew jong ngi bas ah ha khappud bad ngi la wanrah ia ki prokram ban pynthikna ia ka roi ka par bad ban kiew ka bha ka miat jong ki paidbah”.
“Ki paidbah ha khappud kila shah iehbein la slem bha, hynrei ngi la pyndep ia ki jingkular daka jingtei ia ka syrok Balat-Dangar-Ryngku, kaba la kular ha ka por ialap elekshon KHADC 2019” ula bynrap.
U Myntri Rangbah ula ban jur ruh ba ka Sorkar NPP ka ngeit smshem ha ka bha ka miat jong ki paidbah bad kala pynurlong ia baroh ki jingkular. Ula pyntip ha kane ka jingialng ba ka project ba T.50 klur kan sa nang pynsuk ia ki paidbah haba kdew ruh ia ka surok Weiloi-Mawsynram ba T.100 klur, kaba la pyntrei mynta hapoh ka project ka World Bank.
“Ki Liang Pyrshah ki lah ban kren kat kaba ki mon hynrei kim pat ju shna ia ka surok ne ka jingkieng hapoh ka thain” ula ong bad bynrap “Ka NPP kala pynthikna ia ka jingshna surok bad ka jingkieng ha Khasipara ka dei kaba dang pynwandur mynta bad shen yn sa pyndep noh ia ka”.
Ula kyntu ia ki paidbah ba kin ai biang ia ka jingshaniah jong ki ha ka NPP kumba kila jied ia ka Sorkar ha ka elekshon KHADC 2019, kaba pynkupbor ban wanrah ia ka roi ka par.
Haba pynpaw ba ki jaka khappud ki donkam ia u nongialam uba lah ban treikam, u Conrad ula ong “Nga la iaid ialap elekshon ha ki jaka khappud ha ka por elekshon bad ki paidbah kila iatylli bad ka NPP. Kila kut jingmut ban trei bad nang pynkhlain ia ka NPP ban nang lah pynroi ia ka jylla Meghalaya”.
 bad Myntri Rangbah Conrad K Sangma, ula kyntu ia ki paidbah ka Ri-lum Khasi Jaintia ba kin kyntait war ia ki seng sain pyrthei kiba pyrshang ban wanrah ia ka jingsngew iapher jaidbynriew ha ka elekshon KHADC bad JHADC, ka ban long la 21 tarik Rymphang.){kind=link}