Shillong, Rymphang 21 : Ka jingiathep vote ha Rambrai-Jyrngam constituency na ka bynta ka elekshon KHADC kala iaid beit iaid ryntih khamtam ha ki Polling Station kiba don ha khappud ka Meghalaya-Assam.
U kyrtong shimet Bah Lurshai Kharbani ula khein ia kane ka elekshon kum ka ban sah khana ia ka Rambrai-Jyrngam namar ka jingmih paidbah jong ki paid Garo ban iashimbynta ha ka jingthep vote.
Ula pynpaw ba ha ki elekshon KHADC bala leit noh, kiba bun ki paid Garo kim ju iashimbynta satia ha ka elekshon namar ki sngew shah iehkhun swet haba nujor bad ki paid Khasi. Hynrei, ha kane ka kynti, kila mih ban vote da ka jingsngew skhem, ka jingai mynsien da u nongialam bad MLA RG Momin bad u Kharbani dalade.
Kane ka constituency ka don haduh 16000 ka vote ki paid garo bad 28,000 ka vote ki Khasi. U Kharbani u ngeit ba kaei kaba lajia kan sa jia biang haba kdew ba ha ka elekshon MDC bala dep, u kyrtong ba kyrdan da u MLA ula ioh ia ka jingjop.
U MLA RG Momin ula pynpaw ia ka jingngeit ba ki nongthep vote kin kyrshan ia u Bah Lurshai Kharbani namar ki iohi ia ka jinglong nongialam jong u kum ka lynti ban pynsted ia ka roi ka par. Ki mat ba kongsan ki dei ka jingpyniasoh surok, ka pule dangle bad ka rep ka riang kaba la shu ieh bad ki nongkyrshan ki ngeit ba ka jingjop u Kharbani kan nang pynkhlain bor ban tynruh ia kine ki kam ba sahteng ba kin iaid shakhmat.
