Shillong, Rymphang 21: U kyrtong ka KHNAM na Jaiaw constituency u bah Thomas Passah hynne ka sngi u la ong ba dei ki paidbah ki ban rai iano kin jied kum u MDC ba thymmai ban mihkhmat iaka constituency sha KHADC.
Haba kren sha ki lad pathai khubor hadien ba la thep ia ka vote, u Bah Thomas u la ong “Wat lada nga ong ba nga dei u kyrtong uba biang tam, hynrei ngam lah ban jop da lade, dei ki paidbah ki ban rai iano ban jied ia u MDC ba thymmai jong ka Jaiaw constituency”.
U Bah Thomas u la ong ba ka jingjop ne rem kam da long kaba kongsan haduh katta katta hynrei kaba kongsan eh ka long ban iada ia ka jingmyntoi, ka jinglong tynrai, ka riti dustur jong ki jaidbynriew riewlum ka Jylla Meghalaya.
“Dei ban iada ia ka jingmyntoi jong ki jaidbynriew riewlum jong ka Jylla ha kano kano ka rukom katkum ki kyndon ba la buh ha ka khyrnit kaba hynriew jong ka riti synshar ka Ri khlem da khein mano ba jop ia ka ilekshon” ong u Bah Thomas.
Haba pynpaw ia ka jingsngewkhia halor ka jingduna ki nongwan thep vote, u kyrtong ka KHNAM u la buh jingkylli ia ka jingbym shim khia ka tnat District Council Affairs (DCA) bad ka Sorkar Jylla namar ba kam shym la pyntreikam ia ka kyndon ban ailad ia ki briew ba duna dkhot met, bad kiba la noh ka rta ban thep Vote nala iing.
U Bah Thomas u la pyntip ba ka KHNAM kan sa thoh sha ka tnat District Council Affairs (DCA) ban pynthikna ba dei ban ailad ia ki briew ba duna dkhot met, bad kiba la noh ka rta ban thep Vote nala iing.
