Tura, Lber 9: U MLA barim ka Phulbari MLA Esmatur Mominin la kynnoh ba ula Shah shoh ha ka Kynhun ki sengbhalang ha ka sngi Nyngkong mar syn poi ha Ophisar u Deputy Commissioner ha Tura, ban thep kyrteng kum u kyrtong u ban iakhun ia ka elekshon Garo Hills Autonomous District Council (GHADC).
Kane ka jingjia kala jia ha ka sngi ba nyngkong jong ka jingiathep kyrteng ki kyrtong na ka bynta kane ka elekshon.
U Mominin bala synran lang da uwei pat u kyrtong Enamil Haque lem bad ki nongkyrshan, kila poi ha phyllaw ka Ophis u DC dang step hashuwa ka por ban plie ia ka Ophis.
Kat kum ka khubor Pulit, ki bor district ka West Garo Hills kim pat pynmih satia ia ka jingpynbna ha ka por ba kine ki kyrtong kila wanpoi ha phyllaw.
Katba kine ki kyrtong bad ki nongkyrshan ki dang ap ia ka ophis ban plie, ka khubor kala saphriang sted bha bad tang katto katne por, ka Kynhun ki samla kiba dei na ki sengbhalang kila wan iatur shabar ka Ophis u DC.
Wat hapdeng ka jingdon ki bor pahara ha khyrdop ka Ophis, kine ki dkhot sengbhalang kila thom naphang bad rung jubor sha phyllaw sha ka jaka ba ieng kine ki kyrtong. Kala mih ka jingiatim iatla kaba la poi sha ka jingshah shoh u Mominin bad u Haque katba bun ki nongkyrshan kila phet krad na kane ka jaka.
Ki Pulit kila phah marmar ia ka Kynhun Pulit sha katei ka jaka bad kila lah ban tehlakam ia ka jingkulmar shuwa ba kan nang heh bad pur.
Ia u Mominin bad u Haque lem bad ki katto katne ki nongkyrshan lah rah noh da ki Pulit ban ai jingiada bad hadien lah pynkit ia ki sha Tura Civil Hospital ban ai jingsumar ia ka jingmynsaw.
Baroh arngut- u Mominin bad u Haque ki thmu ban iakhun ia ka elekshon GHADC kum ki kyrtong shimet na ka thain Phulbari.
Namar kane ka jingjia, ki Pulit kila pynkhlain bha ia ka bor pahara ha sawdong ka Ophis DC. Ki sengbhalang bapher bapher ka Ri-lum Garo, kiba pyrshah ia ki bar Jylla ban iakhun ia ka elekshon kum ki kyrtong ha kane ka elekshon GHADC, kila ialum paidbah shabar ka Ophis u DC bad pynpaw ba kin iai bteng ban iakhih pyrshah.
U Superintendent of Police ka West Garo Hills Abraham T Sangma, ula pyntip bala pynkhlain bha ia ka bor pahara ha ki jaka then ka Ri-lum Garo namar kane ka jingjia.
.){kind=link}