Shillong Nailur 09: Ki seng sain pyrthei kiba don ha ka Liang Pyrshah kila pynpaw ba kin ym pynieng kyrtong na ka bynta ka elekshon Deputy Speaker kaban long ha ka 12 tarik u Nailur.
U Nongialam ka Liang Pyrshah u Dr Mukul Sangma haba iakren bad ki nongpathai khubor, ula ong, ba kala don ka jingiakren hapdeng ka seng All India Trinamool Congress (AITC) bad ka Voice of People Party (VPP), kaba la lam ha kaban shim ia katei ka rai.
“Nga dang shu dep iakren bad ki paralok ha ka Liang Pyrshah kiba kynthup ia u Bah Ardent Miller Basaiawmoit u President ka VPP. Ha ka jingiakren kala poi sha ka jingia mynjur lang ban ym pynieng kyrtong. Ai ba kan don ka jingjop da kaba suk ia ka shuki Deputy Speaker,” la ong u Sangma.
U Sangma ula pynpaw ruh ba ki seng sain pyrthei kiba don ha ka Liang Pyrshah kin sa pyntip ia katei ka rai sha u Lamphang ka iingdorbar thawain ka jylla.
“Ka long ka lynti kaba biang bha ba ngin sa pyntip ia katei ka rai sha u Lamphang ka iingdorbar ha ka mynsiem jong ka rukom treikam kaba biang kaba la shim ha ka rynsan synshar paidbah, kadei kaba lah pyrshang, kam long kaba lah hynrei wat la katta ka don ka rukom leh kaba koit ba khiah kaba la leh naduh ki por kiba mynshwa ba ia ka elekshon Deputy Speaker la jop khlem da don kano kano ka jingiakhun.
Haba kylli la ki don ia kano kano ka jingthmu ban wanrah ia ka No-Confidence Motion ne ka jingbym don jingshaniah shuh ia ka sorkar, u Dr Mukul Sangma ula ong ‘em’.
“Ia ki mat lah ban rah da kaba shim kabu ia ki kyndon ki bapher bapher kiba la ai hapoh jongka Rules of Procedure and Conduct of Business bad kiwei kiwei ki kyndon jong ka riti treikam. Haba ngi sngew ba ki don katne ki sienjam kiba heh dei ban shimkhia bha, kumta ngin sa pyntip ia phi hynrei ‘em’ na ka bynta kane ka dorbar (ngin ym wanrah ia ka no-confidence motion pyrshah ia ka sorkar),” ula ong.
Ia katei ka elekshon yn pynlong halor ka nongrim ba u MLA ba la rangbah jong ka NPP na Resubelpara u Timothy D Shira ha ka sngi Nyngkong ula iehnoh ia ka kam kum u Deputy Speaker.
