Shillong, Nailar 08: U rangïalehkai ka Ri Morocco u Alaaeddine Ajaraie ula ioh ban thep 2 kol ban pynjop ïa ka lahduh jong ka samoi ialehkai u snem bala dep-ka NorthEast United FC da 2-1 kol pyrshah ïa ka Shillong Lajong FC ha ka jingïakhun kaba itynnad jong ka NorthEast Derby ka Indian Oil Durand Cup kaba 134 ha Jawaharlal Nehru Stadium, Shillong.
Kane ka jingjop ka la pynskhem ïa ka NorthEast United ban ioh rung mynta sha ka Quarter Final watla ka dang don biang ki jingialehkai ba dang sah.
U rangialehkai ka Morocco u Ajaraie ula ioh ban thep ia ka kol kaba nyngkong ha ka minit kaba san hadien ka jinglah ban ia pass bol markylliang bad u Manuel Nunez Martin uba dang shu soi thymmai.
Ka Shillong Lajong ka la ïakhun tyngeh ban iakhaid lyngba u Figo Syndai uba la thep ïa ka kol ha ka minit kaba 81 lyngba ka jingpyllait bol da u Saveme Tariang.
Hynrei ki jingkmen jong ka Lajong bad ki nongkyrshan ka long tang shipor hadien ba u Ajaraie u la ioh ban thep biang iaka kol kaba dei ruh kaba san ha kane ka samoi ba mynta.
Baroh arngut ki coach kata u Juan Pedro Benali na ka bynta ka NorthEast bad u Birendra Thapa na ka bynta ka Lajong ki la pynïalehkai daka kynhun kaba khlain haba sdang ka jingialehkai bad kila kylliang rangialehkai ruh ban pynsted bad pynitynnad iaka jingialehkai.
Ka jingïalehkai ka long ka ba itynnad ha baroh ki liang bad na baroh arkynhun wat ka Lajong ruh kala ioh lad bun sien ban thep lyngba ka jingialehkai ba itynnad na u Sheen Stevenson bad u Phrangki Buam hynrei la shah khanglad ban thep kol namar ka jingtbit u Gurmeet Singh u nongap kol ka Northeast.
Ha kaba kut, ka jingïalehkai ba tbit naka liang u Ajaraie ka la pynshisha ïa ka jingïapher, namar ba ka NorthEast ka la long ka kynhun kaba ar ban rung shaka Quarter Final ha kane ka lympung mynta u snem.
