Shillong, Aug 5: Ka FC Goa kala pynrem ia ka Rangdajied United FC ha ka jingiakhun kaba kot ia ka jingthep kol ba 7 kol, haba sdang ia ka jingiakhun jong ka 133rd Durand Cup, da ka jingjop da 4-3 kol ha ka jingiakhun ka Group F ba long hynne ka sngi nyngkong ha Jawaharlal Nehru Stadium, Shillong.
U Leander D’Cunha, u Devendra Murgaokar, u Lalthangliana, bad u Vellington, kila thep ia ki kol na ka bynta ka Goa katba ki kol jong u Pajuh, u Pynbha bad u Apbor kim shym la biang satia ban lah pynjop ia ka Rangdajied, ka kynhun kaba dang shu rung thymmai ha ka Durand Cup ban ioh khur point.
Ka FC Goa ka la sei ïa ka kynhun kaba ar (second team) hapoh ka jingialam u Coach Israil Gurung da kaba sei ia ki nongialehkai kiba dang samla bad kumjuh ruh ia ki katto katne ngut ki nongialehkai kiba la shemphang bad tbit kum u Devendra Dhaku Murgaokar bad u Akash Oraow.
Katba u Coach jong ka Rangdajied United FC u Aibanjop Shadap u la sdang ia kane ka jingiakhun da kaba pynialehkai da ka 4-3-3.
Watla kala don ka jingjur slap, ka madan ka la jynjar khyndiat, hynrei baroh ar tylli ki kynhun kila ialehkai bha hynrei ha ka minit kaba 19, ka Rangdajied kala ioh thep ia ka kol lyngba u Pajuh da ka jingur bad jingbakla u nongap bak ka Goa.
Ha ka jingsdang ia ka jingiakhun ha ka kylla miet ka FC Goa kala ioh ia ka Penalty na ka jingwoh jong u nongap kol ka RUFC. U Leander D’Cunha ula leit shut ia ka bol hynrei u nongapkol ula lah ban iada ia ka bol pynban ka bol kala leitphai biang sha u Leandar, uba la ioh biang ia ka lad ban shut bad pynrung ia ka bol shapoh kol.
Hadien kane ka Goa kala ioh thep biang ia ka kol lyngba u Devendra bad hadien kane u Pynbha ula ioh thep ia ka kol kaba itynnad na ka bynta ka RUFC.
Ka Goa kala ioh ban tam biang lyngba ka jingioh shut ia ka Penalty namar ka jingktah da ka kti ia ka bol, haba u Abawiha ula leit shut iaka penalty ym shim la pynlehnoh ei bad ula ioh thep ia ka kol.
Hadien kane ka RUFC kala ioh thep ia ka kol lyngba u Apbor na ka jaka kaba ym poi pyrkhat ba ka bol kan dang leit shapoh kol.
Khatduh ka Goa kala ioh ban rah ia ka nam jop da kaba thep ia ka kol kaba 4 ha kaba u Likson ula shut ia ka bol na jngai bad kala leit dei ia u diengkol hynrei u Vellington uba la don ha ka jaka kaba biang, ula shut ia katei ka bol bad ula thep ia katei ka kol hashwa ban kut noh ka jingiakhun.
Ka Rangdajied FC ka dei ka kynhun kaba khatduh kaba la rung ha Durand Cup ha ka Group F hadien ba ka Hyderabad FC kala weng noh na ka jingiakhun ha ka kyllipmat kaba khatduh.
