Shillong, Nailar 26 : Ka lynti iaid jong ka Shillong Lajong FC ha ka Durand Cup 2024, kala poi noh sha kaba kut da ka jingshah pynliem ha ka jingiakhun sem-final da 3-0 kol ha ka North East United FC-kaba la ioh ban rung ha ka sien ba nyngkong eh sha ka Final jong ka Durand Cup.
Ki ar kil ha ka kylla step bala thep da u Thoi Singh bad u nongthep kol ka Morocco Alaaeddin Ajaraie nalor ka kol bala thep da ka por bynrap jong ka kylla miet da u Parthib Gagoi, kala biang pura ia ka kynhun NEUFC ban thaw ia ka histori ha ka Durand Cup. Kan dei ka jingiakhun phainal kaba heh duh jong ka kynhun naduh ba ka mih pyrthei.
U paidbah ba palat 15,000 ngut khambun ki trai shnong, tang hapoh ka 13 minit jong ka jingiakhun, kila kyndeh bad sngap jar na ka jingia kynhoi ia risa hadien ka jingthep kol u Thoi, ia uba la pynmih bujli da u Coach na Spain Juan Pedro Ben Ali bad khamtam eh hadien ka jingioh thep biang sa u Ajaraie ha ka minit ba 33.
Ka kynhun ki rang ialehkai ka Shillong Lajong kila iakhun dohiap ban ioh pynphai ia ki kol hynrei ka jingdon u rang ialehkai ka NEUFC kum u Mohammeed Ali Bemammer ha pdeng madan, kala pynjem khnap ia ki rang ka Shillong Lajong hashuwa ka jingioh thep kol sa u Parthib ha ka 93 minit.
Ka kynhun ka Shillong Lajong kala pyrshang kat kaba lah hynrei ka NEUFC kala lah ban ialehkai bha shadien nalor ka jing pyntur ia ki rang thep kol shakhmat, kaba lam sha ka jingioh thepia ka kol ba lai da u Parthib.
