Guwahati, Naiwieng 13: Uwei u rangbah la kynnoh ba ula shah pyniap ha la u jong u khun hapoh ka shnong Salakati ha Kokrajhar district ka Assam hynnin ka miet sngi Saitjain.
Ia une u lanot la tip kyrteng kum u Bahar Ali. La kynnoh ba u Ali ula shah dung da ka wait ha la u jong u khun uba kyrteng u Sahindar Ali hadien ba ka la mih ka jingiakynad ha iing ha sem.
Katkum ki khubor la ong ba kala don ka jingiania halor ki katto katne ki kam iing kam sem kaba la lam sha ka jingiakynroi.
Utei u khun uba la don hapdeng ka jingbitar ula sei da ka wait bad dung iap iala u jong u kpa.
Watla la pynkit noh mardor shapoh hospital, hynrei na ka liang ki doctor kila pynbna ba ula dep khlad noh.
Mynta na ka liang ki pulit kila pynlong ka jingthwet ban ioh kem ia utei una la shah kynnoh donkti uba la don mynta hapdeng ka jingphet rieh.
