Guwahati, Naiwieng 13: U nongialam students wing jong ka kynhun Popular Front of India (PFI) kaba la shah khein beain uba la don hapdeng ka jingphet rieh ula shah kem noh na Bengaluru, ong ki bor pulit ka Assam hynnin ka sngi Saitjain.
Ka kynhun ki pulit na Assam hapoh ka jingialam jong u ophisar uba ha ka kyrdan DSP ha ka miet sngi Thohdieng ba la lah kila kem noh ia u nongialam ka Campus Front of India (CFI) u Amir Hamja na ki bynta jong ka Bellindur ha Bengaluru ka ja ka kaba ula shong riehtngen ha ryngkat katto katne kiba haiing hasem kiba dei na Tripura, ong u heh pulit.
La ai jingbit ban pynkynriah noh ia u Hamja da u additional chief metropolitan magistrate ka Bengaluru ha kaba la wan ialam noh ia u sha Guwahati, ong ki bor pulit ka Assam.
Yn wanlam ia u hakhmat u chief judicial magistrate, Guwahati, lashai ka sngi Nyngkong, ong ki pulit.
U Hamja uba dei u nongshong shnong ka Baksa district na ka thain shathie ka Assam, ula phet rieh noh khyndiat por hadien ba la khein beain ia ka PFI. Ki pulit ka Assam kila lapdien ia u da ka jingiarap ki pulit ka Bengaluru.
Haduh kumba 40 ngut ki dkhot ka PFI ki la shah kem noh na ki bynta bapher bapher ka jylla Assam kat haduh mynta.
Na ka liang ki bor pulit kila dep lypa ban khang khyrdep noh ia ka head office jong kane ka kynhun kaba don ha ki bynta jong ka Hatigaon ha Guwahati kumjuh ia ki ophis hapoh Karimganj bad Baksa hadien ba la khang pyrshah ia kane ka kynhun.
