Jop u Heprit na Meghalaya ha ka jingiakhun ki Khynnah
Shillong, Naiwieng 13 : Ki Nongtied golf jong ka Assam kila ioh khur haduh san tylli ki takma ksiar ha ka jingialehkai golf jong ka 2nd North East Olympic Games ba long ha Shillong Golf Course kaba la tip kum ka “ Gleneagles of the East”.
Ka jingialehkai golf kala sdang naduh ka 10 tarik Naiwieng bad kut hynne ka sngi U Blei. Ki Nongialehkai kila iatied haduh 18 thliew ha ka shisngi ha kine ki saw sngi.
Nalor ki san tylli ki takma ksiar, ka Assam kala jop ruh ia artylli ki takma rupa bad artylli ki rnong. Ka Meghalaya kala wan ba-ar na ki Jylla da ka jingioh ia kawei ka takma ksiar, hynriew tylli ki rupa bad saw tylli ki rnong.
Ka Manipur kala ioh ia kawei ka takma ksiar bad artylli ki rnong katba ka Arunachal Pradesh kala ioh ia kawei ka takma ksiar.
Ka Assam kala ioh khur ia ka takma gold jong ka jingialehkai kynhun kaba kynthup ia Snigdha Goswami, Jakir Hussain, Biki Datta bad Kalyan Sahul. Ka Meghalaya kala ioh ia ka takma rupa bad ka Manipur kala ioh iaka rnong.
Ha ka jingialehkai shimet, ka Meghalaya kala ioh ia kawei ka takma ksiar da ka jingjop jong u Heprit ba khynnah tam ha ka jingialehkai ki khynnah. Une u heprit u kyrteng u Jason Passah uba la sdang ia kane ka jingialehkai arsnem mynshuwa hadien ka jingwan phai sha Meghalaya na ka jinglynshop ka khlam. Ka nam ba-ar kala dei sha u Biki Datta ka Assam bad u Jonathan Iawphniaw na Meghalaya.
