Shillong,Jylliew 26 : Ka kynhun Liang Iatei ka Khasi Hills Autonomous District Council (KHADC) ha ka sngi Palei, kala mih jyndat biang napoh ka Iingdorbar Thaw Ain namar ka jingbym ailad u Chairman Bah Strong Pillar Kharjana, ba kin iashimbynta ha ka jingiatai ia ka mang tyngka.
U Chairman u khlem ailad ia ki dkhot ka Liang Iatei ban iatai ia ka Mang Tyngka haba kam ba ka daw ka dei namar ba ki khlem phah ia ki kyrteng ba kin ioh iashimbynta.
“Ka rai jong nga kam dei kaba shah liang. Nga la buh ia ka por 4 baje jong ka 24 tarik Jylliew ba kin phah ia ki kyrteng ki dkhot (kiba kwah ban iashimbynta ha ka jingiatai ia ka mang tyngka). Kane ka dei ka rukom ba ju leh baroh shikatta” ong u Bah Strong haba pynbna ia kane ka rai hashuwa ban sdang ka jingiatai ia ka mang tyngka ha ka sngi kut jong ka Dorbar Lyiur.
Haba ka Liang Iatei kala pan jingpynshai, u Chairman ula ong “Haba ia ka kyrteng phi khlem iaphah,kumno ngan ailad ba phin iashimbynta”.
Kat kum ka jingong jong u, ki don tang 5 ngut ki dkhot kiba la phah ia ki kyrteng ban iashimbynta ha ka jingiatai ia ka mang tyngka.
Namar ka jingbym sngewtynnad ia kane ka rai u Chairman, u Nongialam ka Liang Iatei Bah Titostarwell Chyne bad baroh ki dkhto ka Liang Iatei, kila iamih paidbah na Iingdorbar kum ka dak ka jingpyrshah.
Ha ka sngi Ba-ar bala lah ruh, ka Liang Iatei kala iamih jyndat na Iingdorbar ban pyrshah ia ka rai jong ka Executie=ve Committee ka Voice of the People Party (VPP) ha kaba wanrah ia ka mang tyng kaba long bei-riti.
Ka Liang Iatei kala pyrshah ia ka jingpynrung lang ia ka supplementary demand jong u snem 2024-25 ha ka mang tyngka ba pura u snem 2025-26, iakaba ki ong, ka long kaba beain bad ba bei-riti.
