Shillong, Naitung 6: Ki MDC jong ka Liang Pyrshah ha KHADC ki la kyntu ia ka Executive Committee ba kan lum thup lut ia ki jingshad tynrai kumjuh ruh ki riam tynrai kiba don ha ki Hima bad ki shnong bapher bapher kiba hap ha ka jingpeit jong ka Council kum shi bynta ka jingpynneh pynsah ia ka riti dustur bad ka kolshor ka Jaidbynriew.
Haba wanrah ia kane ka phang, u MDC ka Congress na Nongstoin Bah Gabriel Wahlang u la ong, “Ka District Council kaba dei ban peit bad pynneh ia ka Riti Dustur pynban la mang tang 9 lak tyngka na ka bynta kiba bun ki kam kiba dei ha ki constituency.”
U la ong ruh ba na kaei kaba ki iohi wad ka Shad Suk Mynsiem ruh ka KHADC kam don bynta ei ei watla kadei na ka bynta ban pynneh pynsan ia ka riti dustur.
Halor kane, na ka liang u Executive Member ka tnad Arts and Culture, Bah Victor Ranee u la ong ba nalor ka song jingiarap ba ka Council ka ai sha baroh 30 ngut ki MDC ka don ruh ka Khasi Heritage Village ha Mawphlang kaba ka Council ka don bynta na ka bynta ban pynneh pynsah ia ka riti dustur tynrai jong ka Jaidbynriew.
U la iathuh ruh ba mynta ki don 11 tylli ki iingtrep jong ki hima bapher bapher kaba la buh khnang ba man ki hima kin buh ia ki riam tynrai bad ruh ia ka jinglong tynrai kaba ki don ha ki hima jong ki. U ong ruh ba katei ka sienjam ym tang ba ka pynneh ia ka riti dustur hynrei ka long ruh kumba ailad ia ki nongwan jngohkai pyrthei ban tip kham bha shaphang ka jinglong kyrpang jong ka Jaidbynriew.
“Ngi la khot la wer ruh ia ki hima ba lada ki don kino kino ki tiar ne ki jingbuh kiba iadei bad ka rit dustur ne kolshor ba kin wanrah bad buh hangtei,” la bynrap shuh shuh u EM.
Na ka liang u MDC ka Mawhati, Bah Charles Marngar pat u la ong ba la ka council ka ju buh rekod ne em ia ki jingshad tynrai lane ki jaka shad tynrai kiba don ha kylleng ki hima ba hap ha jingpeit jong ka KHADC.
Halor kane na ka liang u EM u ong ba ia mynta hi kim pat don ka rekod tangba ka EC ka la don jingthmu ban leh ia katei da kaba bthah ia ki hima baroh ba kin wanrah bad buh ia ki riam tynrai ha kitei ki iing hima kiba la tei kyrpang ha Heritage Village kaba ha Mawphlang.
