Shillong, Naitung 6 : U Chief Executive Member ka KHADC, Bah Titostarwell Chyne u la byrngem ban pyntip bad ujor sha ka sorkar pdeng lada jia ba ka sorkar ka dang pynslem ban pyllait noh ia ka bhah ba ka sorkar pdeng ka phah na ka bynta ka Health and Sanitation.
“Na ka sorkar pdeng ki la kwah ba ngin pyntip noh ia ki halor kane. Kumta la dei ban pyntip noh sha ka Ministry ha Delhi ba ngim pat ioh ia kane ka pisa haduh mynta,” ong u CEM haba jubab halor ka jingkylli ba wanrah da u MDC ka Mawkyrwat Bah Carness Sohshang haba iadei bad ka bhah kaba ka Council kadei ban ioh.
Nalorkata, u CEM u ong ruh ba ka sorkar jylla lada ka pyllait mynta ruh kadei ban ai lang bad ka sut.
Ha kajuh ka por u kyntu ruh ia ki para MDC ban iai shah namar na ka liang ka Executive Committee ka la shim ia ka rai ban buddien lang. U ong ruh ba ki kyrmen ba ha kine ki khyndiat por ban wan kin ioh noh ia katei ka bhah bad lada jia ba kim pat pyllait kin hap ban leit kynduh biang ia u Myntri Rangbah.
Shwa kane, u Executive Member Bah Victor Ranee u la pyntip ruh ba dang ha u bnai Jymmang mynta u snem u Deputy Chief Executive Member, Bah Gigur Myrthong u la thoh biang sha u Myntri Rangbah ban pynkynmaw ia u halor katei kajuh ka phang.
