Shillong, Nailar 28 : Ka supplementary demand ba T.2.37 klur ka dei ban siew tulop ia ki 13 ngut ki Food Safety Officer ba dang shu thung thymmai bad ki 21 ngut ki nongtrei technical ba thung contract jong ka State Food Testing Laboratory, ong u Myntri ka Koit ka Khiah Bah Wailadmiki Shylla ha Iingdorbar Thaw Ain ha ka sngi Thohdieng.
Haba jubab ia ka cut motion bala wanrah da ki MLA, Miani D Shira, Ardent Basaiawmoit, Brightstarwell Marbiang bad Mizanur Kazi, u Bah Wailad ula ong ba T.1.98 klur ka dei ia ka tulop ki FSO bad T.39.15 lak ka dei ia ki nongtei ka Laboratory.
U iathuh ba ia ki 13 ngut ki FSO la thung ha ka 9 tarik Nohprah 2025 lyngba ka MPSC hadien bala aiti ia ka mang tyngka u snem 2026-27.
La buh ia ki mynta ha baroh ki district, kynthup 4 ngut ha East Khasi Hills bad 3 ngut ha West Garo Hills.
Ki 21 ngut ki nongtrei Lab- ki trei ha ka Food Testing Lab kaba don marwei ha Pasteur Hill naduh u snem 1981- kaba la bei tyngka mynshuwa da ka FSSAI bad hadien la shimti noh da ka Sorkar Jylla ha ka 13 tarik Kyllalyngkot, 2023 ban pynthikna ba ki jingleh test kin iai bteng.
U Bah Wailad u iathuh ba kane ka lab kala test haduh 16,682 tylli ki sample hapdeng u Iaiong 2021 haduh u Iaong 2026 bad ka jingpyntreikam ia ka Food Safety ka shong eh ha ki nongtrei ba leit shabar ka Ophis bad ka jingbishar ka lab.
Halor ka jingtest ia ki dohkha, ula iathuh ba 30 na ki 788 ki sample la test positive ba ki khlem formalin ha u snem 2023-24, kaba lam sha ka jingkhang wanrah ia ka dohkha ba 15 sngi. Ula kyntu ia ka Iingdorbar ban num khate ia kane ka mang tyngka.
