Nongpoh, Risaw 05: Da ka jingangnud ban ai jinghikai bad btin lynti ïaki samla pule shano ba kin jam hadien ba kila pyndep ïaka Class X bad Class XI hadien ba bun naki samla ki duh jingkyrmen bad kim tip shano ban leit ban jied ïaki jingpule katkum ka jingthrang ka jong ki, ki samla pule barim jong ka St Michael’s Higher Secondary School Umsning mynta ka sngi kala pynlong da ka program ba kyrpang ban ai jinghikai sha ki khynnah pule jong katei ka skul lyngba ka career guidance bala pynlong ha Auditorium Hall jong katei ka skul.
Ha katei ka program la wan ban ai jinghikai da u Dr Airpeacewell Rani Asst. Professor ka Synod College bad u Shemborlang Rynjah Secretary ka KJWA Research Cell kum ki Resource Person bad ka long ruh ka jingmyntoi ïaki spah ngut ki khynnah pule kiba la wan ban sngap ha katei ka sngi bala sakhi ruh da ka jingdonlang i Sr. Aidalyne Sohkhlet Principal ka St Michael’s HSS, Fr Pius Shadap Parish Priest ka Umsning Parish, Bah Nicky Kharthangmaw President ka St Michael’s Past Pupil Association, ki nonghikai bad ki samla pule barim jong katei ka skul.
Naka liang kitei ki nonghikai kila ai ka jingbatai ba bñiah ïaki samla pule kiba la wan ban sngap ha katei ka sngi namar ka jingbtin lynti bad ka jinghikai ka long kaba donkam ïaki khynnah ba kin tip shano ba kin jam bad kiei ki jingpule ba kin jied katkum ka jinglah bad ka jingsngew tynnad jong ki, ym ban shu bud tynneng kat ba leit kiwei namar kane kan ïalam pynban ïaki sha ka jingmynsaw namarkata ka donkam ïaki nonglam lynti ban pyni ïaki samla kumno ba kin nang ban jied ïaka lawei ka jong ki.
Kila ong ruh ba ki don shibun ki lad jingpule ba ki khynnah ki lah ban leit hadien ba kila pyndep ïaki jingpule Class X bad Class XII, ym ban kheiñ poh ïa kino kino ki tnad pule namar baroh ki don lakajong ka bynta lada ki khynnah ki trei shitom bad minot thop.
Namarkata kila kyntu ruh ïaki samla pule ha katei ka sngi ba ki dei ban nang ban jied ïaka jingpule kaba ki kwah khnang ba kin poi sha ka thong kumba ki angnud haka jingim jong ki.
Ha katei ka sngi naka liang ki samla pule barim (Past Pupil) jong ka St Michael’s Higher Secondary School kila sam ruh da ki khusnam sha ki samla pule kiba pass bha haka eksamin SSLC bad HSSLC da ka Fr Felix Bollini Academic Award kum ka jingai mynsiem ïaki samla pule.
