Jowai, Risaw 05 : Ka All Jaiñtia Midday Meal Workers Union hynne ka sngi Palei kala pynlong ia ka jingiakhih ha ka phyllaw ophis jong ka District School Education Officer, West Jaiñtia Hills ban pynkynmaw ia ka sorkar ba kim shym la ioh ia ka jingsiew mynta la 6 bnai.
Ka Union hapoh ka jingialam u Nongaibuit Bah K.L.Pariat, u President Bah Jerry Anderson Suting bad kiwei kiwei, kila leit ban iakynduh ruh ia ka Sub Division School Education Officer, West Jaiñtia Hills ka Kong A. Syiem.
U Bah Pariat ula pyntip ba ia ka jingiakhih la pynlong ha kylleng ki jaka jong ka jylla ban pynpaw ia ka jingbynniaw bad lada ka sorkar kam shimkhia ia ka jingdawa jong ka Union, ka Union kan hap ban pynsawa jur shuh shuh ia ka jingiakhih.
U Bah Jerry Anderson Suting ula ai por haduh ka 13 tarik mynta u bnai ia ka sorkar ba kan pyndep noh ia ka jingsiew lem kumta ka jingiakhih kan poi haduh ha nongbah Shillong.
