Shillong, Naiwieng 18: U Lat ka jylla u CH Vijayashankar hynne ka sngi baar, ula ban jur ia ka jingdonkam ban long kiba peitngor ha kaban iada ia ka jingiatylli hapoh ka ri.
Ula ong, ba ka jingbyrngem ia ka jingiatylli ka lah ban mih na ki bor kiba nabar bad ruh napoh jong ka ri hi bad ula kyntu ia ki nongshong shnong ban long kiba peitngor bad ban iengskhem ha kaban pynneh ia ka imsuk imsain hapoh ka ri.
“Kadei ka kamram ka jong ngi ban pynneh ia ka jingiatylli, ka jinglah ban ia imsuk lang bad ia ka mei India” ula ong.
U Lat ula kren ia kane ha ka Rashtriya Ekta Diwas (National Unity Day) kaba la long ha Raj Bhavan’s Dorbar Hall kum ka jingrakhe ia ka lyngkhuh sngikha jong u Sardar Vallabhbhai Patel.
Ula pynpaw ia ka jingiaisah kynmaw ia ka jingtrei borbah u Sardar Patel bad ula ong ba udei u “Iron Man of India” uba la buh ia u mawnongrim na ka bynta ka jingiatylli, ka jingneh skhem bad ka jingkiew shaphrang.
U Vijayashankar ula pynpaw ia ka jingsngewnguh ia ka Meghalaya Police, BSF, CRPF, nonghikai bad ki khynnah pule halor ka jingshimbyntalang ha kane ka jingialang.
U Lat ula pynkynmaw ba u Sardar Patel ula leh ia ka kamram kaba khraw bha ban pyniatylli ia ki jylla bad ban saindur ia ka ri India bad ong ba kane kadei ka jingseisoh kaba khraw tam ha ka kam sain pyrthei.
Ula banjur ruh ba ka jingnoh synniang u Patel ban tei ia ka jingsynshar kaba khlain lyngba ka jingseng ia ka All India Services—IAS, IPS bad IFS bad shim ia ki ba kidei ki “steel frame of India” kaba la bteng ban batskhem ia ka jingiaibteng ka rukom treikam bad ban imsuk imsain hapoh ka ri.
U Vijayashankar ula pynpaw ba hapoh ka jingialam u Myntri Rangbahduh ka ri u Narendra Modi, ia ka National Unity Day la rakhe ha kylleng jong ka ri ban pynskhem ia ka jingiohi jngai jongka “Ek Bharat, Shreshtha Bharat.”
Haba kren shaphang ka Meghalaya, ula iaroh ia ka jingriewspah ka jylla ha ka jingdon ia ki kolshor ki bapher bad ka jingbatskhem ia ka kular ban pynneh ia ka suk ka sain, ka jingburom mar kylliang bad ban ia imlang.
U Lat ula pynkut da kaba kyntu ia ki nongshong shnong ban iengskhem ha ka jingkular ban ban tei ia ka ri kaba khlain bad ba ka ri India kan kiew shaphrang bad ula pynpaw ia ka jingkyrmen ba ka mynsiem jong ka jingiatylli kan iai bteng ban btin ia ka Meghalaya bad ia ka ri sha ka jingsuk, ka roi ka par bad ka lawei kaba phyrnai.
