Shillong, Rymphang 05: Ki don 155 tylli ki jait sim kiba im ha pung Umiam, Ri Bhoi District.
Kane ka long katkum ka kaiphod jong ka Asian Waterbird Census, 2024 bala wad bniah daka tnat Meghalaya Forest & Environment lyngba ka ophis Divisional Forest Officer, Khasi Hills Wildlife Division Shillong haka jingiatreilang bad ka Meghalaya Biodiversity Board haka 2 tarik mynta u bnai.
Ia kane ka jingwad bniah, la leh ha Umsaw, Umbir, Umniuh, Mawlyndep bad Umiam, ki shnong kiba don marjan bad ka pung Umiam bad ia kane ka jingwad bniah la leh bad daka jingiarap u H Lato, IFS, DFO Social Forestry Division, M Kharsyntiew, MFS, Assistant Conservator of Forests bad ki kynhun treimon sngewbha Aaranyak (Dr.) Dipankar Lahkar bad Pranjal Deka naka Meghalaya Biodiversity Board (Dr) E. Khongwir and (Dr.) S Dey.
Ha kane ka jingwad bniah la shem ba haduh 155 tylli ki jait sim ki im ha kine ki shnong marjan bad ka pung Umiam.
Ka Asian Waterbird Census (AWC) kadei shibynta bad ka International Waterbird Census (IWC).
Ia kane prokram ban ithuh iaki jait jingim khamtam iaki sim kiba im haki shnong ha ki jaka shong um la leh naduh u bnai Kyllalyngkot haduh Rymphang hakaba ki stad na kylleng ka Dewbah Asia bad ka Ri Australasia kila wan ban shim bynta.
Ia kane ka sngi la kynmaw ruh kum ka “World Wetland Day” bad ka jinglum khana samari kadei ruh ruh kum shi bynta ban rakhe iaka kane ka sngi.
Ha kane ka jinglum khana samari la ithuh ruh iaka pung Umiam kum ka jaka sah ba kongsan jong kine ki sim.
