Nongpoh, Rymphang 5: Ka Shnong Umdohkha Them kala ioh ia ka Iingdorbar Hall kaba thymmai hynne ka sngi Nyngkong kaba la pyntrei na ka skhim SRWP bad ka MGNREGA.
Ïa katei ka ïing Dorbar kaba thymmai la tei haka jinglut kaba 5 lakh tam.
Ïa katei ka ïing Dorbar la plie da u MLA Nongpoh bah Mayralborn Syiem haka jingiadon lang u BDO ka Umling C&RD Block u bah E. Dkhar, Bah D Shylla, Asst. Executive Engineer PWD Nongpoh, PP Yadhav BMC Umling Block, Bah Bishar Lyngdoh Rangbah Shnong lem bad kiwei kiwei ko reiw Rangbah.
U Bah Mayralborn Syiem haba kren ha katei ka sngi u la ai ka jingiaroh iaki nongialam shnong halor ka jinglong tylli jong ki ban pynurlong ia kane ka kam da kaba synrop lang ia ka skim MGNREGA bad ka Skim SRWP kaba la long shisha ka jingmyntoi kaba khraw ym tang iaki nongialam shnong hynrei iaki Nongshong shnong ruh kumjuh.
Naka liang ki nongialam shnong ki la pynsngew ruh ïa kiwei kiwei ki jingdonkam jong ka shnong lyngba ki dorkhas bala ai sha u MLA ba kynthup ïa ki surok rong kiba sam lyngba sha kiwei pat ki shnong, ki kamra skul bad kiwei kiwei.
