Shillong, Jylliew 12 : Hato phi ju kylli kumno ka dohkha ba phi bang ban bam bad ka ja ka dei kaba bun kaba shu pyneh doh (preserve) bad wanrah na shabar ka Jylla? Lada phim pat ju leh ia kata, ka por kala dei ia phi ban wad ia ka jingshisha bad ban tip ia ki kynja dawai ba ju pyndonkam ban pynneh ia ka doh jong ka dohkha kum kiba dang shu tong (fresh) kiba die ha ki iew ki hat.
Kane ka long kaba kongsan bha ia phi ban tip namar, dang shen ka Sorkar Meghalaya kala pynmih ia ka hukum ba khang ia ka jingdie, jingpynpoi bad jingbuh ia ki dohkha ba wanrah na shabar ka Jylla haduh 15 sngi, kaba la mih hadien ka jingshem ia ka jingkhleh dawai formalin ha ki dohkha ba wanrah na shabar ba kin nym pyut.
Kiba bun ki dohkha ba poi ha Jylla Meghalaya ki dei kiba wanrah na Andhra Pradesh, West Bengal, Assam bad Bangladesh.
Kham hashuwa kane, ka jingkhleh ia ki dohkha da u mercury ka dei kawei na ki jingkhuslai ia ka koit ka khiah u paidbah
Kaei ka Formalin?
Ka formalin ka dei ka dawai pynneh doh kaba ju pyndonkam ha kaban wieh ia ki dohkha ba kin lait na ki jingpyut. Kat kum ka jingong ki stad ki jhad, kane ka dawai ka dei ka bym long satia ban pyndonkam ha kaban pyn-eh doh ia ki dohkha kaba dei ka mar ban bam.
Kane ka dawai ka dei kaba paw bha ha ki kam shalan dohkha.
Lada ngeit ia ki jingwad bniah jong ki stad ki jhad, ka formalin ka dei kawei na ki agent ba wanrah ia ka jingpang bampong (cancer).
Ha ka jingshisha, ia ka formalin la ju pyndonkam ban injek ia ki metiap jong ki briew khnang ba kin lait naka jingpyut.
Kumno ki dohkha bala wieh bad injek formalin ki ktah ia ka koit ka khiah jong phi
– Ka buh ia ka jingma kaba khraw ban ioh ia ka jingpang bampong.
– Ka buh ruh ha ka jingma ba lah ban pynioh ia ka jingpang sahiaw.
– Kane ka dawai ka lah ruh ban pyniap ia phi (la ong ba u rangbah briew u lah ban iap hadien ka jingioh bam haduh 30 ml ka dawai formalin kaba don haduh 37 % ka formaldehyde).
– Ka formaldehyde ha ka formalin ka lah ruh ban buh jingma kaba khraw ban ioh ia ka jingpang luekemia.
– Ka lah ban pynkynroi prie, pynsat ia ki khmat, pynjur ia ka jingjaw ummat bad khmut.
– ka jingbam ia ka formalin ka lah ruh ban lam sha ka bronchitis bad pneumonia
-Ka lah ban pynioh ruh ia ka jingpang kidney bad liver.
Kumno phin tip ba ki dohkha ki dei kiba la injek ne wieh formalin?
Ka long kaba kongsan ia phi ban tip la ka dohkha ba phi thied ban bam ka dei kaba la wieh bad injek ne em ia ka formalin.
Khmih hangne ba phin tip kumno ba phin tip-
– Peit bha ia ka jingeh ka doh jong ka dohkha
– Sma ia ka dohkha
-Kumjuh ruh, lada dei ba la khleh dawai ha ka dohkha, phi dei ban iohi ba yn ym doh satia ki skain ki ban boi ha kine ki jait dohkha.
– Ki snep (scale) jong ki dohkha kin eh bha.
Lada phi iohi ia kine ki dak, khnang ba phin lait na ka formalin, sait ia kane ka dohkha ha ka um kaba tuid la kumno kumno ruh haduh 10-12 minit eiei.
Kaei kaban jia lada rung ka dawai formalin ha ka met jong phi
Shuwa ba ka dawai formalin ka rung ha ka met briew, kan sa don shibun ki jingktah ia ka met kum ka –
-jingthut ha ka kpoh bad liver
– jingmih khniang sniehdoh
– jingeh ban ring mynsien
– jingdap lyer
