Shillong, Jylliew 11: Ka tnad Pule Puthi ka jylla kala pynmih iaka jingpynbna paidbah ba la weng noh iaka Kong Aiom Ksiar Diengdoh kum ka Principal ka Pine Mount School, Shillong bad la thung noh ia ka kum ka Special Officer haka Directorate of School Education & Literacy.
Katkum ka jingpynbna paidbah kaba la pynmih haka 9 tarik u Jylliew da u Commissioner & Secretary ka tnad Pule Puthi u Praveen Bakshi, la pynbna ba ka Kong AK Diengdoh kaba long ka Principal jong ka Pine Mount School kala shah pynkynriah kam noh bad shah thung kum ka Special Officer ha ka tnad DSEL.
Namar ka jingpynkynriah kam, ka Tnad kala thung noh shwa shipor ia ka Kong Wertimon Dkhar kum ka Principal b athymmai ka Pine Mount School ba kan pyniaid shakhmat ia ki kam ki jam jong ka skul haduh ban da pynmih da kawei pat ka hukum.
Lah ban ong, ba ka jingshah pynkynriah kam noh ka Kong Diengdoh kum ka Principal jong ka Pine Mount kadei hadien ba kala mih ka jingiakhih ha u snem bala dep ha katei ka skul, kaba la pynlong syndon ia ki nonghikai bad ki khynnah skul ban dawa na ka sorkar jylla ban weng noh ia ka Principal halor ka jingkynnoh ba ka skul kala hiar arsut bad kala don ruh ka jingpyndonkam bakla iaka pisa jong ka skul.
