Dep pynbeit ia jingthut sam um ka GSWSS | Donkam ka jingtohkit ban tynrong ia jingbahkhlieh : Myntri

Shillong, Nohprah 17 : U Myntri ka Tnad Public Health Engineering (PHE) Marcuise N Marak ha ka sngi Balang ula pyntip ba ka Tnad PHE kala shimkhia ban pynbeit ia ka jingthut ka jingsam um hapoh ka Greater Shillong Water Supply Scheme (GSWSS), kaba sdang naduh ka 10 tarik Nohprah hadien ka jingpei u pipe um ha 101 Area hapoh ka Division-I.

Kat kum ka jingong u Myntri, ka Tnad kala marmot ia une u pipe um ba bthei bad kan ka jingsam um kan sa bteng biang kumba ju long naduh ka sngi Palei.

Haba kren sha ki lad pathai khubor, u Myntri ula batai ba ka jingpei u pipe um kala jia hapoh jong ka surok ba dang shu shna thymmai da ka National Highway & Infrastructure Development Corporation Limited (NHIDCL), kaba buh ha ka jing eh ban tih ia ka surok bad ban maramot. Dei namar kata, ka tnad PHE kala hap ban siang pipe na kawei ka lynti kaba long kuba 300 meter.

“Ka Tnad kam shym la lah ban maramot ia u pipe um ba pei namar ka don hapoh jong ka surok NHIDCL. Kumta, ka Tnad kam don lynti da kumwei pat lait na kaba siang pipe thymmai na kawei pat ka lynti, kaba shimpor kumba phra sngi ban pyndep” ong u Marak haba pyntip ba kane ka jingjia kala jia ha ka por ba dang pynbeit lynti ban siang ia ki pipe um ka PHE ia kaba la leh namar ka jingshna ia ka surok.

U Marak ula kubur ia ka jingeh bala mad da ki nongshongshnong bad kular ba ki Ophisar bad ki Nongtrei ka PHE kila trei khlem shongthait wat hapdeng ka miet, ban pyndep ia ki pipe um thymmai ban lah pynpoi um sha sor.

“Ki Ophisar jong ngi kila iasahmiet ha katei ka jaka mynta la shitaiew. Kila iatrei hapdeng ka miet bad ka jingkhriat ban pynthikna ha kaban lah pynbeit noh kham kloi ia kane ka kam” ula ong.

U Marak ula pynpaw ba kane ka jingpei ki pipe um lehse ka lah ban dei ha ka por ba pyntrei ia ka surok. Ula kdew ia ka jingduna ka jingiatreilang bad ka jingiakren ha ka por ba dang pyntrei ia ki kam, haba ban jur ba ka NHIDCL kala dei ban pyntip sha ka Tnad PHE hashuwa ba kan pyniaid shakhmat ia ki jingtei halor jong ki pipe um.

Halor ki lad jingiada hadien habud, u Marak ula ong ba ka Tnad kan sa kyrpad ia ka Sorkar Jylla ba kan thung ia ka jingtohkit khnang ban tynrong ia ka jingbahkhlieh bad pynkut ia kum kine ki jingjia. “Ka jingtohkit ha ka kyrdan jong ka Sorkar kan iarap ban lah tynrong iaka jingbahkhlieh bad ban pynthikna ba kum kine ki jingleh bakla kin ym jia shuh” ula ong.

Haba iadei bad ka jingsam um, u Myntri u pyntip ba ia ka um yn sa sdang ban pynpoi sha Shillong naduh ka janmiet sngi Balang namar ka jingpynkoit/pynrkhiang ia ki pipe ba pyniasoh thymmai ka donkam 12 kynta.