Shillong, Naitung 07 : Ki Pulit ka East Khasi Hills kila dep ithuh ia ki briew kiba wiang ding ia ki katto katne ki kali kynthup ka kali Pulit hynnin ka miet sngi Palei ha Laitumkhrah Police Station.
Haba iakren bad ki nongthoh khubor, u Superintendent of Police ka East Khasi Hills Bah Sylvester Nongtnger ula ong ba um pat lah satia ban iathuh ia ka kyrteng jong ki briew kiba la ithuh ba ki donkti ha ka jingwiang ding ia ki kali.
Haduh lai tylli ki kali kynthup kawei ka thuk thuk kila julor ha kane ka jingshah wiang ding. Kine ki kali ki dei ka Gypsy ki Pulit kaba don u nombor ML02-0238, ka tourist ML05-Y-9977, bike-MLO5-H-3908 bad kawei ka Alto bym ioh nombor.
Une u Heh Pulit ula kyntait ruh ia ka jingkynnoh pynibor jong ki CrPF haba kam ruh ba katto katne ki briew kila pyrshang ruh ban knieh ia ka suloi jong uwei u CrPF.
U Bah Nongtnger ula pynpaw ruh ba um pat lah satia ban batai ia ka jingsuba donkti jong ki kynhun Sengbhalang ha kane ka jingjia ha Laitumkhrah Police Station namar ba ka jingtohkit ka dang iaid shakhmat.
Hashuwa kane, ka Myntri ka koit ka Khiah bad MLA ka East Shillong Kong Ampareen Lyngdoh kala shong jingialang bad u SP ka District bad SP (City) Bah Vivek Syiem ha ka jingiadonlang u MDC ka Laitumkhrah-Malki Bah Fantin Lakadong.
Kat kum ka khubor, kane ka jingjia kala mih hadien ka jingkynnoh ba ki Pulit kila kyntait ban register ia ka ejahar bala mudui da kine ki samla kiba shah shoh hakhmat ka Ophis u DHS, Laitumkhrah.
Halor kane, u SP ula kyntait ba kam don satia kano kano ka jingkyntait ban register ia ka ejahar. Ula ong ba ka jingkulmar hi kala mih hapdeng kine ki juh ki kynhun ba iahuri hura haba ki iatakhuh biang ha ka jingwan ujor ejahar hapoh Thanad.
Ula pyntip ba kawei ka liang kala aiti ia ka ejahar hynrei kawei pat kala kyntait bad kane kala pynmih biang ia ka jingiania bad poi ruh sha ka jingiania bad ki Heh Pulit ha Thanad. Dei ha kane ka por ba ki briew ba don shabar kila wiang ding ia ki kali.
Ka Kong Ampareen ba ka Ain kan sa tohkit ia kaei kaba la jia bad ban ailad ia baroh arliang mamla ba kin ujor ia ki ejahar. Ki Pulit kin sa tohkit bad ban shim ia ka lynti jong ka ain.
Pule lang ia kane: Wad buit ka Sorkar Jylla ban pynmih bording na ki niut bad jaboh jabain
