Shillong, Nov 29: Ki pulit ka Meghalaya kila dep ban ithuh ia ki 9 ngut ki briew kiba dei ki nongdie drok kiba la shah kem man la ka por bad kine ki lah ban ngat ha ka jingpynsajia da ka jingset along ba 3 snem khlem bah jamin.
Ia katei la iathuh da u Myntri sorkar uba khmih iaka tnad Social Welfare Bah Paul Lyngdoh ha ka kynhun jong ka seng Hynniewtrep Youth Council (HYC), kiba la leit ban iakynduh ia u hynne ka sngi Balang, ban kyrpad ban pynkhlain ia ki sienjam ban leh da kaba tyngeh ia ki nongdie drok.
Ka HYC kala kyntu ia ka sorkar jylla ban pyntreikam pura noh ia ka Prevention of Illicit Traffic in Narcotic Drugs and Psychotropic Substances (PIT-NDPS) Act khnang bay n pynjur bad pynkhlain shuh shuh ia ka jingkhynra ia ki nongdie drok be-aiñ da kaba kem bad pynngat ia kiba donkti/ nongdie kiba la shah kem la bunsien, hapoh kikyndon kiba tyngeh jong ka PIT-NDPS Act.
Ha kane ka jingialang, u Myntri ula pyntip ba ki Pulit kila ithuh ia 9 ngut ki nongkhaii droks ba la kem bunsien bad ia ki kyrteng jong kine, la phah sha ka Advisory Board ba kan bishar shuwa ban pynngat ia ki hapoh ka PIT-NDPS Act, kaba pynngat jingpynsajia ba 3 snem khlem bah jamin.
U President ka HYC ula banjur ba ym dei tang kitei ki 9 ngut kiba la pynkhein aiñ hynrei ki dang bun ngut kiba dei ban shah pynngat hapoh jong ka PIT-NDPS Act.
Ula pynpaw ba katba ka sorkar ka dang thaw ia ka Advisory Board kumba la pynkupbor haka PIT-NDPS Act ha u Naitung 2023, kam long kaba shai kdar la ka Board kala ai kano kano ka jingbthah ha kaba iadei bad ka jingdei ban kem ia kino kino katkum katei ka aiñ haduh kine ki sngi kiba mynta.
Nalor kane, ka HYC kala kyntu iaka sorkar jylla ba kadei ban thaw iaka Fast-Track ne Special Court kaban khmih thik tang ia ki jingjia kiba iadei bad ki case hapoh jong ka NDPS Act.
