Shillong, Nohprah 11 : U Nongialam ka NPP bad Myntri Sorkar Rakkam A Sangma ha ka sngi Balang ula ong ba ka Meghalaya ka dei ban seng da ka Fice-Star lane Seven-Star Hotel ha ki jaka khappud ban bsa ia ka dohmasi shet kylla sha ki paralok na Assam.
Kane ka jingkynthoh jong u kala mih halor ka rai ba dang shen jong ka Sorkar Assam ba ialam da u Himanta Biswa Sarma, ban khang noh ia ka jingbam doh masi ha ki jaka paidbah ha Assam.
Haba khein ia kane ka rai kum ka bym iahap satia, u Rakkam ula ong “Naba ka Sorkar Assam kala khang ban pyniap bad bam doh masi, shi bynta ka bha palat ia ka Meghalaya. Ka Meghalaya ka dei ban seng ia ka Five-Star lane Seven-Star Hotel ha Byrnihat, Khanapara-ha ki jaka khappud khnang ba kan lah ban pynioh bam dohmasi ia ki nong Assam. Ai ba ki paralok na Assam kin wan sha Meghalaya bad ban bam doh masi bha jai bad sa leit phai biang sha Assam. Ki hotel bad restaurant kin ioh kamai bha”.
Ula ong ba kum kane ka rai kala pynhiar kyrdan ia ka Ri, kaba la iatip ia ka jingiatylli bad jingialong kawei.
Une u Nongialam ka NPP ula pynkynmaw ruh ia ka jingiatai jong u (L) Purno A Sangma ia ka Bill bala wanrah da uwei u dkhot ha Parliament ha u snem 1987 haba u ong “Ka jingpyniap ia ka masi bad bamdoh ia ka masi ka ktah ia ka jingsngew ki paid Hindu bad ka niam hynrei ha ki riewlum, ngim ju tep ia ki baieid bathoin ba iap khlem da pyniap masi, ngim ju rakhe ia ki jinglehkmen baroh khlem da pyniap masi, ngim ju khawai khlem da pyniap masi”.
Ula pynkynmaw ba ia ka riti synshar ka ri India la pynwandur ha ka rukom ba baroh ki nongshongshnong ka Ri ki hap burom mar kylliang.
Haba kylli, u Rakkam ula ong “Mano mano ruh kim don hok ban pyrrkhing lane khang ia ngi ban bam eiei. Nga bam naphang kat kaba don. Nga bam palat ia kaei kaba u bah Sanbor u bam. Ngam kwah ban jer kyrteng lut. Lada u MLA ka BJP u bam doh masi balei kiwei pat ki BJP, ki ruh ki dei ban bam”.
U Bah Sanbor, MLA ka South Shillong, dang shen ula pyrshah ia ka rai ka Sorkar Assam da kaba ong ba ka rukom bam ka dei ka mon ba lah ban jied hi da uwei pa uwei u briew.
