Dawa tohkit ka TMC ia ki jingkynnoh ka Congress pyrshah ia ka NPP

Shillong, Nailar 23: Ka All India Trinamool Congress (TMC) kaba don ha ka Liang Pyrshah, kala dawa ban tohkit bniah halor ka jingkynnoh jong ka seng Congress ba ka seng National People’s Party (NPP) ka la pyndonkam da ka pisa be-ain ban thied ia ki MLA na kiwei pat ki seng sain pyrthei.

Haba ïakren bad ki nongthoh khubor ha ka sngi Thohdieng, u Nongïalam ka TMC bad Myntri Rangbah barim ka jylla Dr Mukul Sangma, ula ong ba u President ka Congress Bah Vincent H Pala ula kren da kaba tyngeh ba ka seng kaba don ha ka liang synshar kala leh ïa ka kam ban khwai da kaba pyndonkam da ka pisa “be-aiñ”.

“Kitei ki jingkynnoh kila mih, kumta ka sorkar bad ki nongialam ki dei ban pyni iaka jingkhuid ka jongki bad nga kyntu ba dei ban tohkit bniah halor katei ka mat” ula ong.

“Ki don lai tylli ki jingkynnoh. Kawei ka dei halor ka pisa be-aiñ kaba la kynnoh ba ka wan na u drok, kawei pat kadei ka pisa kaba la kynnoh ba ka wan na ka jingtih dewiong be-aiñ bad kawei pat kadei ka jingleh thok ia ki kam kontrak. Kumta lada kine ki lai tylli ki jingkynnoh ki la mih, ka long kaba donkam ba ka ïing dorbar ba kan ïakren ïa kane ka mat,” bynrap u Dr Mukul.

Haba kylli, u Myntri Rangbah Barim ula ong, ba ka seng kan sa peit ia ka jingioh ia ka lad ban rah kyrpang ia katei ka mat hapoh ka iing dorbar thawaiñ ka jylla.