Nongstoin, Lber 05 : Ka KSU Nongtrai Sepngi Unit hynne ka sngi Balang, kala dawa ia ka DHMO ka West Khasi Hills ba kan shimkhia ha kaban shna noh ia ka Sub Centre hapoh ka shnong Langdongdai, West Khasi Hills.
Kane ka Seng hapoh ka jingialam u President samla Kitbor Riangtem, kala iakynduh ia ka DMHO bad pyntip ba kane ka Shnong haduh mynta kam pat don satia tang kawei ruh ka jaka ai jingsumar ia ki briew ba pang ba shitom.
Ka pyntip ba haduh mynta, ki nongshongshnong ka thain ki hap ban leit wad ia ki lad jingsumar shaduh sha Riangdo, kaba jngai kumba 38 Km hapdeng ka surok kaba khohruh khohram bad ba shimpor kumba 2 kynta eiei.
Ka KSU kala ban jur ba dei ban shna noh mardor ia ka Sub Centre na ka bynta ka bha ka miat u paidbah.
Ka pyntip ba na ka liang ka DMHO kala kular ban sa shimkhia ia kane ka jingdawa bad ban sa pynsngew sha ki bor kiba halor.
