Nongpoh, Nailur 28: Ka Seng Treilang Longkmie Iewmawlong bad ka Seng Samla Iewmawlong hynne ka janmiet sngi Balang, ki la dawa ia ki bor ka ain ba kin ai ka jingpynsajia da kaba set along shirta jingim ia u bar Jylla uba pyniap dusmon ia ka samla lud ha ka shnong Pahamsyiem.
Kine ki seng kila pynlong ia ka jingialang ban iatai halor ki kam pyntriem bad ka jingjia kaba sngewsih kaba wan hap ha ka shnong na ka jingshah dkhat jubor ka jingim jong ka samla ba dang 19 snem ka rta.
Haba kren sha ki lad pathai kubor, ka Kong Ibrosta Suchiang President bad ka Kong O. Kharbih Vice President, ki la pynpaw ka jingsngewsih halor kane ka jingjia haba pynrem jur halor ka jingleh jong u ne u riew thrang shnam u ba u la nud ban leh Im im peit peit ia kane ka kam la kum ba leh iaki mynsiem mrad.
U President ka Seng Samla ka Shnong Arsitone Ryndongsngi, bad E Maiong General Secretary, ki la pynpaw ba ka seng samla shnong ka pynrem jur halor kane ka kam pyntriem haba kyntu ia ki Khun samla ba kin long kiba phikir ha ka shongkha shongman bad ban kiar na ka jingiapoi kha bad ki bar jylla ban lait na kum kine ki jingjia kiba lah ban ktah ia ka jingim.
Ka Seng Samla ka la kyntu ruh ia ki bor pulit ba kim dei ban pynlait ia u Dil Bahadur Thapa hynrei ban set along shijingim.
