Shillong, Naiwieng 28: U National Secretary ka Bharatiya Janata Party (BJP) u Rituraj Sinha hynne ka sngi nyngkong, u la dawa na u Myntri ka tnat kam pohing bah Lahkmen Rymbui ba un hiar shuki noh namar ka jingbym lah ban ai jingiada iaki paidbah ka jylla Meghalaya.
Haba kren sha ki lad pathai khubor u Sinha u la iathuh ba haka 27 tarik mynta u bnai ha ryngkat kiwei ki nongïalam ka seng BJP Meghalaya, u la leit mih sha ka shnong Mukroh West Jaiñtia Hills ban noh jingiarap sha ki 5 tylli ki longing ba khlad haka jingshah ther kuli ha ki pulit Assam, kaba la jia haka step 22 tarik mynta u bnai.
U Sinha u la ong ba kane ka jingwan kyntur pud ki Pulit Assam ha Meghalaya ka pyni iaka jingtlot ka tnat kam pohing ka sorkar Meghalaya bad dei namar kane u Myntri ka tnat u dei ban shim ka jingkitkhlieh bad udei ruh ban hiar shuki don burom.
“Kum u Myntri ka tnat kam pohing, u bah Lahkmen Rymbui u dei ban shim ïa ka jingkitkhlieh halor ka jingjia haka step 22 tarik mynta u bnai hapoh ka shnong Mukroh bad bad lada u don ka jinglehrain, u dei ban hiar shuki noh” la ong u Sinha.
U Sinha u la ther ia u bah Lahkmen da ka ba ong ba ka tnat pulit haka jingshisha ka lah dei ban ai jingiada iaki paidbah kiba mad jingeh ha ki thain khappud hynrei ia ki Pulit la shu pynsyrtap ha nongbah Shillong.
U la ong ba kane la jingbym lah u bah Lahkmen ban pyniaid iaka tnat ka pyni shai lyngba ka jingbym lah pynbiang bad jingduna ha ka jindon ki pulit ha Meghalaya ka ba la shah shim noh ïa ki mynsiem ba lui lui jong ki riew paidbah.
Ula pyntip ba shen naka liang ka BJP Meghalaya kan ïakynduh ïa u Myntri Rangbah ka jylla Assam ban phah tohkit halor ki jingbakla na ka liang jong ki Pulit Assam kaba la wanrah ka jingjia ba sngewsih ha Meghalaya.
Une u National Secretary ka BJP u la dawa naka sorkar Meghalaya ban aikam sorkar ia iwei na ki 5 tylli ki longing kiba la ngat ha ka jingjia ba sngewsih.
