Shillong, Naiwieng 28 : U Myntri Rangbah ka Jylla Conrad K Sangma ula pyntip ba ka Sorkar Jylla kala rai ban pynieng ia ki Border Outpost (BoP) jong ki Pulit ha baroh ki jaka kiba jur ka jingiakynad pud ha khappud ka Jylla bad ka Assam.
Kane ka rai kala mih hadien ka jingjia Mukroh ha kaba haduh hynriew ngut ki briew kila iap na ka jingther kuli ki Pulit Assam ha ka 22 tarik u Naiwieng.
“Lashai ka sngi ka Kynhun Myntri kan sa rai khatduh ia ka thup kyrteng jong ki jaka kiba donkam ban pynieng ia ki BOP. Ngi la pyntip ia kane ka rai sha ki Nongialam na ki seng sain pyrthei bapher bapher ba ngin pynieng ia ki BOP ha kine ki jaka ba jur ka jingkynad” ong u Myntri Rangbah hadien ka jingialang jong baroh ki seng sain pyrthei kaba long hynne ka sngi nyngkong.
Informed the political leaders that the Cabinet will sit tomorrow to finalise the list of the various Border Outposts (BOPs) that will be set up in sensitive areas & to ensure they are supported by the required manpower & infrastructure to function pic.twitter.com/XY8duRuPrr
— Conrad Sangma (@SangmaConrad) November 28, 2022
Ula pyntip ba kine ki BOP kin don ia ki bor Pulit kin long kiba khlain bha, ki jingdonkam kiba biang nadong hadong khnang ba ka BOP kan treikam bha bad kin pynthikna ia ka jingshngain bad long ki nongiada ia ki nongshongshnong ha khappud.
Halor ka jingdawa ka Dorbar Shnong Mukroh ban weng noh ia ka Forest Beat House ka Assam na Mukroh, u Myntri Rangbah ula kular ba un sa iakren ia kane ka kam bad ka Sorkar Assam.
Haba kylli, u Myntri Rangbah ula pyntip ba ka pyrton ki Pulit kila don mynta ha katei ka jaka bad ka Sorkar kan sa pynskhem ruh ia kane ka pyrton ba kan iai bteng ban don beit ha shnong Mukroh.
U Myntri Rangbah ula ban jur ba ka Shnong Mukroh ka dei kaba dang hap hapoh ka Jylla Meghalaya. “Wat na ki map bad ka kaiphod 2011, ka Mukroh ka dang hap hapoh u pud u sam ka Meghalaya” ula ong.
