Agartala, K’lyngkot 25: Hadien ba ki bor ba dei khmih ilekshon ki la tah da ka sia iong ia ki dur postar jong u Myntri Rangbahduh (PM) ka ri ha ka jaka ban shu weng ia ki shwa ka jingpynlong ia ka ilekshon ha Tripura, na ka liang ka BJP ha Tripura hynnin ka sngi Nyngkong ka la kyntu ia ka Election Commission ba kan shim ka jingpynshitom pyrshah ia kito ki heh ba dei khmih kiba la tah da ka sia iong ia ki dur postar jong u PM Modi ia kiba la wah ha ki jaka paidbah.
Ha ka 21 tarik mynta u bnai ka model code of conduct ka la treikam hapoh Tripura bad na ka liang ki heh pyniaid ilekshon ki la sdang ban weng ia baroh ki jingwah, ki postar bad ki lama jong ki party sain hima na ki jaka paidbah.
Haba kren sha ki lad pathai khubor, u nongialam ka BJP uba dei ruh u Myntri ka Parliamentary Affairs u Ratan Lal Nath u la ong, “Ha ki katto katne ki jaka, ngi la sakhi ba ki don katto katne ki bor khmih ilekshon kiba la tah da ka sia iong ia ki dur postar jong u PM Modi ha ka jaka ban shu weng ia ki dur jong u na ki jaka paidbah.Ngi la thoh sha u Chief Electoral Officer (CEO), u Gitte Kirankumar Dinakarrao bad kyrpad ia u ba un shim ka jingpynshitom pyrshah ia kitei ki briew kiba donkti ha kaba kum kane ka kam kaba long beain.”
U Nath u la ong ba ki heh kiba khmih halor ki kam ilekshon ki la dei ban shu weng ia ki dur jong u PM Modi na ki jaka paidbah ha ka jaka ban shu tah sia iong ia ki dur ki jong u.
Hashwa ka jingpynlong ia ka ilekshon assembly ha Tripura, ki party sain hima kiba kham kongsan ki la sdang ban pynkhreh na ka bynta ban pynlong ia ki jingiaid rally khnang ban khring ia ki nongthep vote.Ka jingiathep vote ha Tripura kan long ha ka 6 tarik u Rymphang 2023.
Ka BJP ha ryngkat ka paralok synrop IPFT ki la pynkhyllem noh ia ka sorkar Left Front ha Tripura ha u snem 2018, da kaba jop haduh 44 tylli ki seat hapoh ka dorbar assembly kaba don 60 ngut ki dkhot, kaba la pynkut noh ia ka jingsynshar kaba 25 snem jong ka Left kaba la sdang naduh ka snem 1993.Ka CPI-M ka la ioh tang 16 tylli ki seat ha katei ka ilekshon 2018.
