Shillong, Risaw 30 : Ka kynhun ki Tourism Societies na ka thain Darrang, ha ka sngi Palei, kila iakynduh ia u Symbud Myntri Rangbah ba khmih ia ka Tnad PWD (Roads) Bah Prestone Tynsong, bad kyrpad ia ka Sorkar Jylla ban thung mar mar ia ka Committee wad jingshisha (fact-finding committee) ban tohkit bad ban leh eiei halor ka jingkylla jngut bad umktieh ha Wah Umngot namar ka jingpyntrei ia ka surok Shillong-Dawki.
Ka kynhun ka kynthup ia ki nongmihkhmat na ka Darrang Tourism Promotion and Development Society, Shnongpdeng Tourism Development Society, bad Dawki Tourism Development Society, ia kiba la ialam da u Dalloi ka Elaka Darrang Bah Pyrwa Lymba.
Kine ki Tourism Societies kila aiti ruh ia ka dorkhas ba pynpaw ia ka jingktah kaba jur na ka jingpynjaboh ia kane ka Wah bad kumjuh ruh ia ka ioh ka kot jong ki nongshongshnong kiba shaniah ha ki kam jngohkai.
Ka jingpyntuid khyndew kala lam sha ka jingjngut jong ka um, kaba buh jingma ia ka jingpaw nam jong ka wah kum ka jaka jngohkai kaba khuidtam ka Meghalaya.
Kine ki Tourism Societies kila kyntu ia ka Sorkar ba kan pynlong ia ka jingtohkit kaba bniah ia ki daw jong kane ka jingjaboh bad ban shim mardor ia ki sienjam ban tehlakam khnang ban wanrah biang ia ka jingkhuid ha kane ka wah bad ban iada ia ka jingnang jot shuh shuh.
“Watla ngi tip ia ki katto katne ki daw kiba dei ki thymmei jong kane ka jingjaboh, ngi shaniah ha ka jingstad jong ka Sorkar ba kan pynlong ia ka jingtohkit kaba bniah bad ban leh eiei mardor. Namar kata, ngi kyrpad ia ka Ophis jong phi ban tuklar mar mar, la ka long da kaba thaw ia ka Committee wad jingshisha lane da kaba shim ia ka sienjam ban tehlakam noh khnang ban iada ia ka jingjot jong ka Wah” kila ong.
Nalor kane ka jingpynjaboh ia ka wah, ka kynhun kala kyrpad ruh ban pyrkhat thymmai halor ka por khang ia ka leit ka wan na kane ka surok ha ka thain Laitlyngkot.
Kumba long mynta, ka por ba khang iaid ki kali na kane ka surok ka long naduh ka por 11 baje mynstep haduh 4 baje janmiet, kaba la ktah ia ka leit ka wan ki nongjngohkai ha ka por tlang. Ka kynhun klaa kyrpad ban pynkylla noh ia ka por sha ka 12 baje mynsngi haduh 4 baje janmiet.
Ha ka kyrwoh, ka kynhun kala pynpaw ba ka jingkylla jaboh bad jngut jong ka Wah Umngot ka dei namar ka jingshna ia ka surok Shillong-Dawki.
Ka pyntip ba u Symbud Myntri Rangbah ula ai ka jingkular ha ka kynhun ba un sa khmih ia kane ka kam bad ban wad ia ki lad ki lynti ban tehlakam noh ia ka. Ula pynpaw ia ka jingkmen ban iohi ia ka jingshitrhem jong ki kynhun ba iashimbynta ban pynroi ia ki kam jngohkai bad kular ha ki ia ka jingkyrshan jong u ban kyntiew ia ka kam jngohkai ha ka thain.
Ha kane ka jingialang la iashimbynta ruh u MLA barim Bah Stephanson Mukhim, uba mihkhmat ia ka Amlarem Constituency.
