Shillong, Nailur 05: Ki seng na rilum Garo Hills hynne ka sngi Ba-ar, kila dawa naka Myntri ka tnat ka koit ka khiah kong Ampareen Lyngdoh ban pynsangeh mardor iaka jingthungkam iaki Middle Level Health Provider (MLHP) hapoh ka Ri-lum Garo.
Kine ki Sengbhalang ki kynthup ia ka Garo Student Union (GSU), Federation of Khasi Jaintia & Garo people (FKJGP), ka A’chik Youth Welfare Organization (AYWO), Federation of Achik Freedom (FAF) bad ka Association for Democracy and Empowerment (ADE)
Kine ki Seng kila kynnoh ba naka liang ka tnat National Health Mission (NHM) Meghalaya ka khlem pynmih ia ka jing pyntip lane ka Advertisement ban pynbna ba laitkam MLHP hapoh ka Jylla.
Haba kren sha ki lad pathai khubor hadien ka jingiakynduh iaka Myntri, u President ka FKJGP Garo Hills Pritam Areng ula iathuh ka tnat NHM haka 23 tarik Nailar kala pynmih ka jingpyntip ban thungkam iaki 41 ngut ki samla haka kam Middle Level Health Provider (MLHP).
U Pritam ula iathuh ba ki sengbhalang kila pyrshang ban wad jingtip kumno ka tnat NHM kala jied ia kine ki 41 ngut hynrei la lap ba ka tnat kam shym la pynmih iaka jingpyntip paidbah ba laitkam.
“Hadien bala wad bniah ngi la shem ba ka don ka jingleh khlieh na u Mission Director ka tnat NHM Meghalaya namar ka tnat ka khlem pyntip paidbah ba don ka jinglaitkam MLHP bad dei namar kane ngi la kynduh iaka Myntri ka tnat ka koit ka khiah ban phah sangeh shwa ia ka jingthungkam ia kine ki 41 ngut kiba mut ban shah thung kum ki MLHP” ong u Pritam.
U Pritam ula ong ba kane ka jingleh ka tnat NHM kala pynkhein iaki kyndon ka sorkar jylla haba iadei bad ka rukom thepkam hapoh ka jylla bad kila dawa naka myntri ka tnat ka koit ka khiah ban khmih bniah biang iaka shithi bala pynmih ka tnat NHM ban thungkam iaki 41 ngut.
“Ngi la dawa naka myntri ban pyndam iaka shithi thmu thungkam iaki 41 ngut bad ban khot thymmai biang iaki Application naka bynta ka kam MLHP” ula ong.
