Shillong Naitung 23: Ki Sengbhalang ka Ri-lum Garo, ha ka sngi Baar kila dawa ba dei ban pynlong ia ka jingtohkit kaba bniah halor ka jingiap jong ka Diana Dimre Ch Marak, ka samla pule jong ka Shillong Polytechnic ha u bnai Jymmang 2024.
Ka seng ADE, FKJGP, GSU, AYWO bad ka FAF kila ia ailang ia ka dorkhas sha ka Deputy Commissioner ka East Khasi Hills Kong R.M Kurbah ba kyrpad ba kan tuklar lem halor ka jingbym sngewhun ia ka rukom tohkit kumba la pynpaw da ki bahaiing bahasem jong katei ka samla kaba la khlad noh.
Ka Diana Dimre Ch Marak 24 snem ka rta, ka dang pule ia ka Diploma ha ka Civil Engineering ha Shillong Polytechnic bad ka dang pule ha ka 4th Semester. La lap ia ka met iap jongka ba ka la sahkut hapoh ka hostel jong ki khynnah kynthei jong katei ka jaka pule, ha ka jinglong jingman kaba ipher bha ha ka 6 tarik u Jymmang ha ka por kumba 3 baje mynstep.
“Ki bahaiing bahasem jong kane ka samla kaba la khlad noh kila kyrpad ban iakynduh ïa ngi bad haka jingïakynduh kila pynsngew ïa shibun kiei kiei sha ka jingtip jong ngi, kaba khlem iahap bad ka khana bad ka jinglong jingman ka rukom iap jong ka samla Diana. Ka jingïathuhkhana kaba mynta ka long ba ‘kadei ka jingjia jong ka jingpyniap ialade’,” la ong ha ka dorkhas.
“Ngi ki sengbhalang na ka rilum Garo, ngi kyrpad ia phi ba phin shim ia kane ka kam kum kaei kaei kaba don jingmut, namar kum kine ki jingjia la ju iohsngew mynshwa ha kajuh ka jaka pule bad kum kine ki jingjia ba sngewsih ym dei ban shim sting namar ka lah ban wanrah ia ka jingduh mynsiem kaba kham bun” la pynpaw ki sengbhalang ha ka dorkhas bad ka bynrap “Haba ngi ong kumta, ngi kwah ban pynshai ba ngim shym la thaw ne kynnoh pyrshah ia uno uno u briew bad ngim shym la kynnoh ruh iano iano uba la leh ia kano kano ka kam runar. Hynrei ngi ieng haka nongrim ba dei ban ai iaka hok sha katei samla kaba la khlad bad sha ki bahaiing bahasem jongka bad ka rukom treikam kadei dei ban iaid ha kata ka rukom ba ka jingtohkit kam dei ban don kano kano ka jingleh klet ne jingnoh shilliang.”
Kumta ki la ujor da ka ejahar pyrshah ïa ka jingkynnoh ba ka Diana kala pynïap hi ïalade lyngba ka Zero FIR ha Tura Sadar PS ha ka 16 tarik u Jymmang.
Shuh shuh kila phah ruh ïa ka shithi sha u SP, East Khasi Hills lyngba u Chairman ka Babupara Chambugong Mahari Association.
“Ka long ruh kaba donkam ban shimkhia ba ïa ka kaiphod jongka Post Mortem namar ym shym la aiti sha kiba haïing hasem jong katei ka nongïap haduh katto katne por, la palat ar taiew, watla ki bahaïing bahasem kila pan bunsien ïa ka kaiphod jongka PM bad watla ka kaiphod jong ka PM la pynkut ha ka sngi ba jia hi ha ka 6 tarik u Jymmang. Hynrei tang ynda la thep ïa ka Zero FIR ha ka 16 tarik u Jymmang bad la thoh da ka shithi sha u SP ka East Khasi Hills ba ïa ka kaiphod jong ka PM la aiti sha ki bahaïing bahasem jong kaba la khlad noh,” bad ka bynrap
“Ki Kur kim sngewhun ïa ka ka kaiphod jongka PM namar u nongpeit bniah ia ka
daw jong ka jingiap jong ka Diana ula pynkut ba kadei ka jingsdien phasi, hynrei u ophisar doktor uba la pynlong ia ka jingpeit bniah um shym la phah ia kino kino ki nuksa na ka bynta ka Histopathology bad ki nongialam ka Kur kila kam ba ka jingphah ia ki nuksa na ka bynta ka jingpang ka long kaba donkam na ka bynta kano kano ka kaiphod ba lah ban ngeit jong ka jingpeit bniah ia ka met iap/ka kaiphod hadien ka jingiap, khamtam lada ka nongkhlad ka dei ka kynthei katkum ka ain” kila pynpaw.
Ki sengbhalang kila ong, haba peit ia ki jingjia kiba la jia ha ka 4, 5, 6, 7 bad 8 tarik u Jymmang, 2024 bad hadien kata, “ngi pynkut ba ki jingdawa bad ki jingsngewkhia jong ki dkhot jong ka kur ki long kiba dei hok bad kiba don jingmut bad kumta, ngi ki sengbhalang ngi kyntu ban peit bniah ia kane ka jingpeit bniah bad jingsngewkhia jong ka kur. Ba ym shym la sdang ia kano kano ka kam ha kaba iadei bad ka jingtih ia ka met ban pynlong ia ka Histopathology. Ki bahaiing bahasem ne ka kur kim shim la ioh ia kino kino ki jingtip ia kakaiphod halor ka jinglap na ka jingtohkit kaba mardor jong ki pulit watla kila kyrpad ban ioh ia kakaiphod.
Kila ong ba watla la jer kyrteng ia ki 5 ngut ki para samla pule ha ka Ejahar ha ka 16 tarik u Jymmang, hynrei ym shym la don kano kano ka jingtohkit kaba bniah ia kito ki briew da u IO jong katei ka kam.
“U pulit ophisar uba la pynhiar ia ka metiap jong ka samla kaba la khlad noh shwa ban poi ki bahaiing hasem, wat hapdeng ka jingkyrpad jongki ban ap ia ki bahaiing hasem bad dei ban pynlong ia ka jingtohkit. U briew uba kam ba u dei u dkhot jongka Shillong Polytechnic dei ban wad bad tohkit bniah ia u. Dei ban tohkit ia ka paralok jong ka nongiap bad kylli ia ki khubor hamsaia kaba kila iakren iakhana, namar ba ka lah ban don jingiadei bad ka jingiap jong ka,” la pynpaw ha ka dorkhas.
Kila pynskhem shuh shuh ba dei ban tohkit bniah ia u Warden balei ba um don ha kata ka sngi kaba jia ka jingjia kaba sngewsih.
“Dei ban tohkit ia u Director ka Shillong Polytechnic balei ba ym shym la don kano kano ka bor jongka jingkitkhlieh na katei ka jaka pule ha ka por ba aiti ia ka met iap sha ki bahaiing” kila pynpaw bad ka bynrap ba u Director ym shim la phone ne phah ia kano kano ka jingsngewlem sha ki bahaiing bahasem jong ka samla pule kaba khlad noh haduh kine ki sngi, kaba long kaei kaei ka bym lah ban pdiang bad kaba lam sha ka jingsuba sniew”.
Kila pynpaw ruh ba ka Shillong Polytechnic kadei ban pyndonkam ia ki kor CCTV ban iarap ia ki samla pule ba kin lait na kino kino ki jingma ia ka met bad iaka jingim ka jong ki.
