Nongpoh, Nailur 21: Ki ar tylli ki seng bhalang ba kynthup ïa ka Hynñiewtrep Integrated Territorial Organization (HITO) Umden Area bad ka Meghalaya People’s United Front hynne ka sngi Palei, ki la leit ïakynduh ïa u Executive Engineer ka PWD Division ban pynpaw ïa ka jingsngewkhia halor ka jingsniew palat ka surok Nongpoh-Umden-Sonapur Road.
Kine ki sengbhalang kila dawa ia ka tnad ba kan maramot noh mardor ia kane ka surok bad ban siang rong thymmai noh.
Kila pyntip ba da ki phew tylli ki shnong ba hap ha ka thaiñ Umden Nongtluh kila hap ban mad ïa ka jingeh kaba khraw na ka daw ka jingsniew katei ka ka surok ha ka leit ka wan ki paidbah mynta la bun bun snem.
Kum ban shu pynpaw, kane ka surok kam dei satia kaba pyndonkam tang da ki phew tylli ki shnong ka thaiñ Nongtluh hynrei ka dei ruh ka surok kaba pei lyngba sha ka jylla Assam (Interstate road).
Kine ki arseng ba ïalam da u President ka MPUF Ri Bhoi Bah Jackson Sohtun bad President ka HITO Umden Area Bah Marius Mallai, ki la aiti ruh ïa ka dorkhas ban pynsngew halor ka jingeh ki paidbah na ka jingsniew shaba palat katei ka surok ka tnad PWD.
Kine ki seng ki la pan jingshai ruh na u Engineer halor ka jingslem ban siang rong noh ïa katei ka surok haba pynpaw ia ka jingbym hun satia tang ban maramot hynrei ban thaw syndon da kaba thymmai bad ban siang rong pura ha shilynter jong ka.
Haba ïa kren bad ki Nongthoh Khubor, u President ka MPUF, Ri Bhoi Bah Jackson Sohtun u la ong ba ka seng ka la shim ia kane ka sienjam namar ka jingsngewkhia ia ka jingsyrtok ki paidbah ha ka leit ka wan.
U la ïathuh ruh ba ha ka jingshisha ka la don ruh ka DPR ba la mang tyngka haduh 4 klur tam ban siang rong ïa katei ka surok kumba la lum jingtip na katei ka ophis u Engineer hynrei ym lah pat ban tip na kaei ka daw ba ka sorkar ka pynslem ban siang rong noh ïa katei ka surok.
