Shillong, Risaw 07: Ki samla ba pass iaka eksamin thepkam Staff Nurse bad ANM hynne ka sngi Nyngkong, kila dawa naka Sorkar Jylla ban pynsted noh ha ka ban khot iaka Physical Verification ban iaid shakhmat ka jingthepkam.
Kane ka jingdawa kala mih hadien ba kawei ka kynhun kala wan shakhmat ban dawa naka Sorkar jylla ban sangeh shwa iaka jingthepkam Staff Nurse bad ANM.
Haba kren shaki lad pathai khubor, ka samla Merybahun Marbaniang kala ong “Ngi dei ka kynhun thepkam ba Passed iaka eksamin bala pynmih haka 28 tarik Nailur 2024, Ngi wan hangne ban dawa naka Sorkar bad naka Meghalaya Medical Service Recruitment Board (MMSRB) ban nym pynsangeh ne pynslem ban khot iaka Physical Verification ban thepkam Staff Nurse bad ANM”.
Haba kylli halor ka jingpyrshah kawei ka kynhun ba kynnoh ba ka don jingleh bymhok ban pynbna Result, u samla Iaishemphang Wankhar u la ong “Ka (MMSRB) kala dep ban pynshai halor ki jingshah kynnoh. Ngim don eiei ban kynthoh ia kane ka kynhun hynrei ngi ruh ngi la trei shitom ban pass iaka eksamin”.
U samla Iaishemphang u la ong ba kane kadei ka sien ba nyngkong eh baka MMSRB ka pynbna lut iaka Result, ha ryngkat ki kyrteng bad ki marks jong baroh kiba iakhun haka eksamin.
U la ong ba kito ki para samla ba thoh iaka eksamin ruh ki lah ban thoh haka Grievance Cell jong ka MMSRB bad ka Board ruh kala ai por 10 sngi iaki samla ban ioh jingpynshai halor ki jingkynnoh, ba don ka jingleh bymhok ban pynbna Result.
“Ngi kmen iaka jingpynbna Result ka MMRSB namar ka long kaba khuid kaba suba wat haka por thoh eksamin namar ki don ki nongring dur ha man ki jaka thoh eksam” u la ong.
Haba kylli halor ka ujor, ki samla ba pass iaka eksamin kila ong “Ngi dei ban sngewthuh baka eksamin ka long kaba eh bha. Ngi hap iakhun napdeng 5000-6000 ngut namar ka jinglait kam ka long tang 164 tylli. Ngi kitbok iaki ba pyrshah bad ngi kyntu ba kin pynkhreh bha ban iakhun iaki eksamin hadien habud”.
” Ngi wan hangne ba ngi iakhun iala ka hok. Kumba maki (ba pyrshah) ki don ka hok ban pyrshah ngi ruh ngi don iaka hok ban dawa pynsted ban khot noh iaka Physical Verification namar ngi la pynkhreh bha bad ngi la pass iaka eksamin” kila ong.
